Tómengi palatanıń májilisinde deputatlar tárepinen “Farmacevtika jumısınıń jetilistiriliwi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam joybarı ekinshi oqıwda statyama-statya kórip shıǵıldı.
Atap ótilgenindey, mámleketimizde farmacevtika tarawın rawajlandırıw, talap joqarı bolǵan dári quralları hám medicinalıq buyımlardı lokalizaciyalaw, xalıqtı sapalı hám arzan ónimler menen támiyinlew boyınsha keń kólemli jumıslar ámelge asırılmaqta.
Bul nızam joybarı menen dári quralları hám medicinalıq úskenelerdiń aylanısın xalıqaralıq kriteriyalar dárejesinde tártipke salıw, kletka texnologiyasına tiykarlanǵan biotexnologiyalıq qurallardı islep shıǵarıwdı engiziw belgilenbekte.
Sonday-aq, farmacevtika tarawında texnologiyalar transferin keńnen qollanıw, organizmniń funkcional imkaniyatların tiklew ushın qollanılatuǵın dári quralların medicina ámeliyatına engiziw názerde tutılmaqta.
Nızam joybarında belgilenetuǵın normalar jergilikli farmacevtika kárxanalarınıń quwatlılıǵın arttırıw, tarawǵa zamanagóy texnologiyalar transferin engiziw, densawlıqtı saqlaw ámeliyatında kletka texnologiyalarına tiykarlanǵan biotexnologiyalıq qurallardı qollanıw, medicinalıq úskenelerdiń importı hám eksportın keńeytiw, xalqımızdıń salamatlıǵın bekkem qorǵawǵa xızmet etedi.

M.Komilova, ÓzA