Berdaq atındaǵı Qaraqalpaq mámleketlik universitetine bir qatar tálim baǵdarları hám qánigeliklerin xalıqaralıq kriteriyalar tiykarında bahalaw hám akkreditaciyadan ótkeriw maqsetinde Germaniyanıń «ACQUIN» xalıqaralıq akkreditaciya hám sapanı támiyinlew agentligi wákilleri kelip, bul baǵdarda úyreniw jumısların alıp barmaqta.
Bul processte agentliktiń tájiriybeli ekspertleri – Sharlotta Proges, Martin Borg, Maykl Mayer hám Dana Alina universitette oqıw processleri, bilimlendiriw sapası, oqıw rejeleri, professor-oqıtıwshılardıń potencialı, materiallıq-texnikalıq baza, ishki sapanı támiyinlew sisteması jáne bilimlendiriw procesiniń xalıqaralıq standartlarǵa muwapıqlıǵın úyreniw jumısları menen shuǵıllanbaqta.
Xızmet saparı sheńberinde «ACQUIN» wákilleri Berdaq atındaǵı Qaraqalpaq mámleketlik universiteti rektorı B.Jollıbekov penen ushırasıp, qızǵın hám konstruktivlik sáwbet ótkerdi. Ushırasıw dawamında universitette alıp barılıp atırǵan bilimlendiriw reformaları, xalıqaralıq birge islesiw baylanısları, bilimlendiriwdiń sapasın arttırıwǵa qaratılǵan sistemalı jumıslar, sonday-aq, xalıqaralıq akkreditaciyanıń áhmiyeti hám keleshektegi rejeler dodalandı.
Rektor B.Jollıbekov miymanlarǵa universitette bilimlendiriw procesin zaman talaplarına beyimlestiriw, oqıw baǵdarlamaların xalıqaralıq standartlar tiykarında jetilistiriw, studentler ushın básekige shıdamlı bilim hám kónlikpelerdi qáliplestiriw baǵdarında ámelge asırılıp atırǵan jumıslar haqqında hár tárepleme maǵlıwmat berdi. Sonday-aq, «ACQUIN» sıyaqlı abıraylı xalıqaralıq akkreditaciya agentligi menen birge islesiw universitet ushın áhmiyetli basqısh ekeni atap ótildi.
Sonday-aq, xalıqaralıq ekspertler universitette bar bolǵan zamanagóy oqıw laboratoriyalarınıń materiallıq-texnikalıq bazası, olardıń bilimlendiriw procesindegi ornı, laboratoriya sabaqlarınıń shólkemlestiriliwi, qáwipsizlik talapları hám ámeliy sabaqlardıń oqıw rejeleri menen úylesimliligi máselelerin tolıq úyrenip shıqtı.
Úyreniwler dawamında laboratoriyalarda paydalanılıp atırǵan ásbap-úskeneler, texnologiyalar hám olardıń jańalanıw jaǵdayına ayrıqsha itibar qaratıldı. Ekspertler laboratoriyalarda alıp barılıp atırǵan ámeliy sabaqlar studentlerdiń teoriyalıq bilimlerin bekkemlew, kásiplik kónlikpelerin rawajlandırıw hám zamanagóy miynet bazarınıń talaplarına sáykes qánigeler tayarlawda ayrıqsha áhmiyetke iye ekenin atap ótti. Sonıń menen birge, laboratoriyalıq sabaqlarda studentlerdiń belsendiligi, professor-oqıtıwshılardıń ámeliy tájiriybesi hám innovaciyalıq kózqaraslar da kózden ótkerildi.
Kózden ótkeriw procesinde «ACQUIN» wákillerine laboratoriyalardıń jumısı, olardıń bilimlendiriw baǵdarlamalarındaǵı roli, xalıqaralıq standartlarǵa muwapıqlıǵı hám keleshektegi rawajlanıw rejeleri haqqında tolıq maǵlıwmatlar berildi.

Adilbay Orazov,
Qaraqalpaqstan xabar agentligi sholıwshısı.