Qazaqstan eksportı geografiyasında birinshi márte Ózbekstan tiykarǵı eksport sherikler qatarına kirdi hám mámleket ulıwma eksport kóleminde 4,5 procent úles penen top-jetekshi mámleketler qatarınan orın aldı.
Qazaqstannıń ulıwma eksport kólemi 71 mlrd 135,7 mln AQSh dolların quraǵanın esapqa alsaq, bul – Ózbekstan esap beriw dáwirinde 3,2 mlrd AQSh dollardan zıyat bahalanǵan qońsı mámleket ónimlerin import etti degeni.
Analitiklerdiń pikirinshe, bul Oraylıq Aziya mámleketleri arasındaǵı ekonomikalıq integraciya tereńlesip atırǵanı hám bazarlardı diversifikaciyalaw procesi jedellesip atırǵanın kórsetedi.
Qazaqstan ónimleriniń tiykarǵı qarıydarları elege shekem Italiya (20,1 procent), Qıtay (19 procent) hám Rossiya (10 procent) bolıp qalmaqta. Sonday-aq, Niderlandiya (7,7 procent) hám Túrkiya (5 procent) da jetekshi eksport baǵdarları qatarında atap ótilgen.
Qánigelerdiń pikirinshe, Ózbekstannıń tiykarǵı eksport bazarlarınıń qatarına kiriwi regionallıq birge islesiwdiń jańa basqıshqa kóterilip atırǵanınan dárek beredi hám kelesi jıllarda óz-ara sawda kólemleri jáne de artıwı kútilmekte.

Qaraqalpaqstan xabar agentligi