Jaslar – mámleket keleshegi, reformalarımızdıń tayanıshı hám rawajlanıwımızdıń háreketlendiriwshi kúshi bolıp esaplanadı. Búgingi kúnde elimizde jaslardı hár tárepleme qollap-quwatlaw, olardıń bilim alıwı, kásip-óner iyelewi hám óz potencialın júzege shıǵarıwı ushın barlıq sharayatlar jaratılmaqta.
Usı maqsette Ellikqala rayonında jaslar menen tikkeley pikirlesiwdi kúsheytiw, olardı qıynap kiyatırǵan mashqalalardı ornında sheshiwge qaratılǵan “Hákim hám jaslar” ushırasıwları turaqlı shólkemlestirilip kelinbekte.
Búgin Ellikqala rayonı hákimi V.Niyazimbetov rayon orayındaǵı Kórkem óner sarayında 600 ge shamalas jaslar menen ashıq hám qızǵın pikirlesti.
Ushırasıwda rayon hákimi Prezidentimizdiń basshılıǵında jaslarǵa baylanıslı mámleketlik siyasatqa ayrıqsha itibar qaratılıp atırǵanlıǵı, jaslar ushın bilimlendiriw, bántlik, isbilermenlik hám sociallıq qollap-quwatlaw baǵdarlarında keń imkaniyatlar jaratılıp atırǵanlıǵın atap ótti.
Sóylesiw procesinde jaslar ózlerin táshwishke salıp atırǵan máseleler, usınıs hám baslamaları menen shıǵıp sóyledi. Bildirilgen hár bir múrájat rayon hákiminiń qadaǵalawına alınıp, juwapker basshılarǵa orınlanıwın támiyinlew boyınsha anıq wazıypalar júklendi.
Ushırasıw sońında rayon turmısında belsene qatnasıp kiyatırǵan, intaker hám ibratlı jaslarǵa rayon hákimligi tárepinen minnetdarshılıq xatları hám estelik sawǵaları tapsırıldı.
Jaslar menen ashıq pikirlesiw – mashqalalardıń sheshimine, imkaniyatlar bolsa jańa jetiskenliklerge jetekleydi.

Qaraqalpaqstan xabar agentligi.