Germaniya Donald Tramptıń Grenlandiya máselesinde Evropaǵa basım ótkeriw siyasatın ashıqtan-ashıq ironiya menen kútip alıp, qáwipli dep atadı. AQSh Prezidenti Daniyanı atawdı satıwǵa májbúrlew ushın Evropadaǵı awqamlaslarına tarif penen qáwip salıp atırǵanda, Berlinniń sabır kesesi toldı, dep jazǵan “Reuters”.
Eksportqa súyengen GFR ekonomikası ushın bul basım awır soqqı. Avtomobil qurılısı, mashina qurılısı hám ximiya sanaatı álleqashan sawda keskinliginiń aqıbetin basınan ótkermekte. Sanaatshılardıń eskertiwinshe, eger Evropa búgin jeńillik berse, erteń jáne de aqılǵa uǵras kelmeytuǵın talaplar qoyıladı.
Germaniya injenerler hám sawda palataları Tramptıń siyasiy maqsetti ekonomikalıq jazalaw menen baylanıstırıwın qabıl etip bolmaytuǵın jaǵday sıpatında bahaladı hám Bryusselden qatań, bir juwaptı talap etti. Atap aytqanda, tariyxta birinshi márte “anti májbúriy ilaj mexanizmi” iske qosılıwı múmkin.
Tarif siyasatı álleqashan anıq sanlarda sezilip atır: “Volkswagen” milliardlap evro zıyan kóriwi múmkin, “Mercedes” hám “Porsche” basım astında, BASF bolsa eksport krizisine dus kelmekte. AQSh ele Germaniyanıń eń iri bazarı bolsa da, sawda kólemi tómenlemekte.
Berlin ushın másele tek Grenlandiya emes, al eski kontinenttiń siyasiy ǵárezsizligi, ekonomikalıq suvereniteti hám basımǵa qalay juwap beriwi baǵdarındaǵı sınaq máselesi bolıp tabıladı.

Musulmon Ziyo, ÓzA