Hákimshilik sudlar puqara hám isbilermenlerdiń nızamlı máplerin isenimli qorǵawda áhmiyetli orın iyeleydi. 2017-2024-jıllarda hákimshilik sudlar tárepinen 102 mıńnan aslam is kórilgen bolıp, olardıń 60 procenti qanaatlandırılǵan.
Endi sırt el tájiriybesinen kelip shıǵıp, hákimshilik sudlardıń ornı hám roli jáne de kúsheytilmekte. Sonıń ishinde, hákimshilik sudlarǵa sudqa húrmetsizlik hám sudtıń jeke ajıratıwı talapların orınlamaw jaǵdayları boyınsha islerdi kóriw wákilligi berilmekte.
Hákimshilik sud jumısların júrgiziwde isenimdi huqıqıy qorǵaw principi engizilip, dáslepki tıńlaw institutı qollanıladı.
Sonday-aq, hákimshilik sudlar tárepinen hákimshilik juwapkershilikke tartıw tártibi anıq belgilenbekte. Lawazımlı shaxslardıń hákimshilik sudta májbúriy qatnasıwın támiyinlew názerde tutılmaqta. Yaǵnıy, sud májilislerinde sebepsiz qatnaspaǵan lawazımlı shaxslarǵa sud járiyması qollanıw mexanizmi engiziledi.
Sonday-aq, hákimshilik sudlardıń qararları mámleketlik uyımlar yamasa shólkemler tárepinen orınlanbaǵan jaǵdayda, olardıń lawazımlı shaxslarına sud járiymaların qollanıw, qayta orınlanbaǵanı ushın sud járiymasın arttırılǵan muǵdarda qollanıw názerde tutılmaqta.
Bunnan tısqarı, dáslepki tıńlaw nátiyjesinde arza kóriwsiz qaldırılǵan jaǵdayda tólengen mámleketlik bajını qaytarıw tártibi belgilenbekte.
Puqaralar hám isbilermenlik subektleriniń huqıqların sud arqalı qorǵawdıń zamanagóy mexanizmlerin engiziwge qaratılǵan nızam joybarı Oliy Majlis Nızamshılıq palatasındaǵı siyasiy partiyalar frakciyalarınıń májilislerinde birinshi oqıwda kórip shıǵılmaqta. Joybar menen Hákimshilik juwapkershilik haqqındaǵı kodeks, Hákimshilik sud jumısların júrgiziw haqqındaǵı kodeks hám “Mámleketlik bajı haqqında”ǵı nızamǵa tiyisli ózgerisler hám qosımshalar kirgizilmekte.

Muhtarama Komilova, ÓzA