Bul ilajlar “Baslamalı byudjet” joybarınıń 2025-jılǵı 2-máwsiminiń nátiyjeleri boyınsha ámelge asırılmaqta.
Bul baǵdardaǵı jumıslardı kózden ótkeriw hám qurılıs jumıslarınıń sapalı ámelge asırılıwın támiyinlew maqsetinde Moynaq rayonı hákimi juwapker qánigeler menen birge usı aymaqlarǵa barıp, gónergen gaz qubırların jańalarına almastırıw boyınsha alıp barılıp atırǵan jumıslar menen tanıstı.
Atap aytqanda, Hákim ata APJ «Doslıq» awılı aymaǵındaǵı turaq jaylardı hám kótere tutınıwshılardı tábiyiy gaz benen támiyinlep kiyatırǵan, ulıwma uzınlıǵı 8,2 kilometrlik joqarı basımlı (D-159-219 mm) jer astı gaz qubırı zamanagóy talaplar tiykarında D-100 mm.lik jer ústi gaz qubırına almastırılıp rekonstrukciyalanbaqta. Sonday-aq, temir-beton tumbalar ornatılıp, arnawlı kompensatorlar jaylastırılmaqta.
Sonday-aq, Qızıl jar APJ aymaǵında Moynaq rayonı gaz bólistiriw úskenesinen APJ orayına shekemgi 9000 metrlik aralıqtaǵı diametri 89 mm. bolǵan gónergen gaz qubırı diametri 150 mm.lik jańa, zamanagóy gaz qubırına almastırılmaqta.
Bul joybarlar “Baslamalı byudjet” baǵdarlamasınıń 2025-jılǵı 2-máwsiminiń nátiyjeleri tiykarında ámelge asırılmaqta. Álbette, bul jumıslar xalqımız tárepinen bildirilgen baslama hám usınıslardıń ámeliy nátiyjege aylanıp atırǵanınıń ayqın kórinisi.
Bul jumıslar juwmaqlanǵannan soń gaz támiynatı jáne de turaqlasadı, úzilisler hám basım menen baylanıslı mashqalalar saplastırıladı, eń áhmiyetlisi, qáwipsizlik dárejesi sezilerli dárejede artadı.

Qaraqalpaqstan xabar agentligi