Nókis qalasında Ózbekstan Respublikası Ósimlikler karantini hám qorǵaw agentligi tárepinen agentlik direktorı I.Ergashev hám Qaraqalpaqstan Respublikası Joqarǵı Keńesiniń komitet baslıǵı A.Jumanazarovtıń qatnasıwında eksportyor kárxana wákilleri menen ashıq sáwbetlesiw bolıp ótti.
Onda eksport penen shuǵıllanıp atırǵan isbilermenlik subektleri, juwapker shólkemlerdiń wákilleri hám taraw qánigeleri qatnastı.
Ushırasıwdan gózlengen tiykarǵı maqset ósimlikler karantini hám onı qorǵaw tarawında eksportshı kárxanalarda dus kelip atırǵan mashqalalardı úyreniw, bar mashqalalardı ornında tallaw, ámeliyattaǵı normativlik-huqıqıy talaplar boyınsha túsinikler beriw hám isbilermenlerdi hár tárepleme qollap-quwatlaw arqalı eksport imkaniyatların arttırıwdan ibarat.
Ashıq sáwbetlesiwde agentlik tárepinen ósimlikler karantini hám onı qorǵaw tarawında ámelge asırılıp atırǵan reformalar, eksport etilip atırǵan awıl xojalıǵı ónimleriniń fitosanitariyalıq qadaǵalawdan ótkeriw tártip-qaǵıydaları, xalıqaralıq talaplar hám sertifikatlaw processleriniń ápiwayılastırılıwı haqqında tolıq maǵlıwmatlar berildi. Sonday-aq, eksport procesinde júzege kelip atırǵan mashqalalar, sonıń ishinde, hújjetlerdi rásmiylestiriw, laboratoriyalıq tekseriwler, karantin talaplarına baylanıslı máseleler boyınsha isbilermenlerdiń múrájatları tıńlanıp, olarǵa tiyisli túsinikler hám ámeliy usınıslar berildi.
Ilaj juwmaǵında agentlik tárepinen eksportshı kárxanalar menen ashıq hám sistemalı sóylesiwdi turaqlı jolǵa qoyıw, olardıń mashqalaların tez sheshiw, sonday-aq, fitosanitariyalıq talaplar tiykarında sapalı hám básekige shıdamlı ónimlerdiń eksportın keńeytiw baǵdarındaǵı birge islesiwdi bunnan bılay da bekkemlew áhmiyetli ekenligi atap ótildi.
Qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi