“Ózbekstan – 2030” strategiyası mámlekettiń orta hám uzaq múddetli rawajlanıw baǵdarların belgilep beretuǵın áhmiyetli strategiyalıq hújjet bolıp, ol turaqlı ekonomikalıq ósimdi támiyinlew, xalıqtıń turmıs dárejesi hám sapasına unamlı tásir kórsetiw, insan kapitalı potencialın rawajlandırıw jáne mámleketlik basqarıwda nátiyjelilik hám ashıq-aydınlıqtı bunnan bılay da arttırıwdı názerde tutadı.

Strategiyada reformalardı izbe-iz dawam ettiriw, jeke menshik sektordıń belsendiligin kúsheytiw, sanlı transformaciya hám “jasıl” ekonomika principlerin engiziw, sonday-aq, bilimlendiriw, densawlıqtı saqlaw hám sociallıq qorǵaw tarawlarında sistemalı ózgerislerge erisiw tiykarǵı maqset sıpatında belgilengen.

Ózbekstan Respublikası Prezidenti Shavkat Mirziyoev bıyıl 26-dekabr kúni Oliy Majlis hám Ózbekstan xalqına jollaǵan Múrájatında belgilengen tiykarǵı wazıypalar mine usı strategiyanı qayta kórip shıǵıw máselesin ortaǵa qoyǵanın atap ótiw kerek.

“Rawajlanıw strategiyası” orayında ǵalaba xabar qurallarınıń qatnasıwında ótkerilgen baspasóz ánjumanında juwapkerler bul haqqında hár tárepleme maǵlıwmat berdi.

Onda “Rawajlanıw strategiyası” orayı bólim baslıǵı Jamshid Sharipov, Ózbekstan Respublikası Transport ministriniń birinshi orınbasarı Mamanbiy Omarov, Energetika ministrligi sekretariatınıń baslıǵı Bekzod Ismoilov, Turizm komitetiniń basqarma baslıǵı Oybek Hakimov shıǵıp sóylep, joybarǵa tiykarlanıp usı tarawlarda belgilenetuǵın tiykarǵı wazıypalarǵa toqtap ótti.

Olardıń sózlerine bola, “Ózbekstan – 2030” strategiyasınıń jetilistiriliwi, onda belgilengen wazıypalardıń jańalanıwı mámleketimizdiń rawajlanıwı hám xalqımızdıń abadanlıǵında úlken áhmiyetke iye. Óz gezeginde, bul processte keń jámiyetshiliktiń belsene qatnasıwın támiyinlew de áhmiyetli másele esaplanadı.

– “Ózbekstan – 2030” strategiyası joybarında Ózbekstannıń globallıq transport-logistika tarmaqlarına integraciyasın tereńlestiriw hám milliy transport sistemasınıń potencialın arttırıw tiykarǵı wazıypalardan. Soǵan tiykarlanıp bul hújjet sheńberinde transport xızmetleriniń kólemin 301 trillion sumǵa shekem arttırıw, jolawshı hám júk tasıw xızmetleriniń kólemin 250 trillion sumǵa jetkeriw, aviaqatnawlardıń sanın 200 mıńǵa, sonıń ishinde, respublika aymaqları arasındaǵı reyslerdiń sanın 41 mıńǵa jetkeriw wazıypaları belgilengen, – dedi Transport ministriniń birinshi orınbasarı M.Omarov.

Energetika ministrligi sekretariatınıń baslıǵı Bekzod Ismoilovtıń málim etiwinshe, jańalanıp atırǵan “Ózbekstan – 2030” strategiyasında 2030-jılǵa shekem “jasıl” ekonomikaǵa ótiw, onıń tiykarın quraytuǵın qayta tikleniwshi energiya dereklerinen paydalanıw kórsetkishlerin keskin arttırıw jáne ekonomika tarmaqları hám xalıqtı zárúr energiya resursları menen úzliksiz támiyinlew názerde tutılǵan. Oǵan bola, qayta tikleniwshi energiya derekleriniń quwatlılıǵın 25 mıń MVt qa jetkeriw hám ekonomika tarmaqları hám xalıqtıń mútájlikleri ushın jetkerip beriletuǵın elektr energiyasınıń kólemi 120 milliard kVt.saatqa shekem arttırıladı.

Sonday-aq, ilajda turizm tarawınıń aldaǵı wazıypaları da aytıp ótildi. Turizm komiteti basqarma baslıǵı Aybek Hakimovtıń atap ótkenindey, 2030-jılǵa barıp sırt el turistleriniń jıllıq sanı 20 millionǵa jetkeriledi, turizm xızmetleriniń eksport kólemi 6 milliard dollarǵa shıǵarıladı hám aymaqlarda 4 mıń jańa miymanxana, miyman úyi hám xosteller shólkemlestiriledi.

Baspasóz ánjumanınıń juwmaǵında juwapkerler bul joybarǵa baylanıslı dodalawlar turaqlı dawam etetuǵının atap ótti.

N. ZIYoDULLAEVA,
ÓzA xabarshısı