16-17-yanvar kúnleri Saudiya Arabstanında futbol boyınsha 23 jasqa shekemgi jaslar arasında ótkerilip atırǵan Aziya kuboginde sherek final oyınları bolıp ótti.
Atap aytqanda, Djidda qalasındaǵı «Shahzada Feysal bin Faxd» stadionında Ózbekstan hám Qıtay jaslar saylandı komandaları yarım final jollaması ushın keskin gúres júrgizdi.
Oǵada qızıqlı ótken bul oyınnıń tiykarǵı hám tóreshi tárepinen qosıp berilgen qosımsha taymlarında dárwazalarǵa gol urılmadı. Buǵan álbette, qıtaylı dárwazaman hám qorǵawshılardıń meytindey bekkemligi sebep boldı desek asıra aytqan bolmaymız. Tóreshi tárepinen belgilengen penaltiler seriyasında bolsa, áwmet qıtaylı jaslarǵa kúlip baqtı hám olar 4:2 esabında jeńip shıǵıp, Aziya kuboginiń yarım finalına jollamanı qolǵa kirgizdi.
Bul ushırasıwda «Aral» futbol klubınıń tárbiyalanıwshısı Samandar Muratbaev saylandı komandamız dárwazasın qorǵaǵan bolsa, jáne bir wákilimiz Muhammedaliy Reymov oyınǵa túsirilmedi.
Al, qalǵan sherek final oyınlarında bolsa, Yaponiya Iordaniyanı penaltiler seriyasında 4:2 esabında jeńgen bolsa, Vetnam Birlesken Arab Ámirliklerin 3:2, Qubla Koreya Avstraliyanı 2:1 esabında jeńiliske ushırattı.
Erteń Aziya kuboginde yarım final oyınları ótkerilip, onda Yaponiya Qubla Koreya, Avstraliya Qıtay jaslar saylandı komandaları final jollaması ushın óz-ara bellesedi.

Adilbay Orazov,
Qaraqalpaqstan xabar agentligi sholıwshısı