Házirgi waqıtta, ǵalaba xabar quralları arqalı puqaralarǵa ózbasımshalıq penen nızamsız qurılmalardı qurıwǵa jol qoyılmawı, onıń aqıbetleri haqqında mámleketlik uyımlar tárepinen turaqlı túrde eskertilip atırǵan bolsa da, ayırım puqaralar tárepinen jergilikli hákimliklerge tiyisli jer maydanlarına nızamsız qurılmalar qurılıp atırǵanınıń gúwası bolmaqtamız.
Bunday nızamsız qurılmalardı buzıw máseleleri sud tártibinde sheshilip atırǵan bolıp, olardıń orınlanıwı Májbúriy orınlaw byurosı uyımları tárepinen ámelge asırılmaqta.
Máselen, Puqaralıq isleri boyınsha Beruniy rayonlar aralıq sudınıń 2025-jıl 23-oktyabrdegi qararına tiykarlanıp, Beruniy rayonı, “Abay” APJ aymaǵında ózbasımshalıq penen qurılǵan turaq jay qurılısı ushın mólsherlengen fundamentti juwapker B.X.nıń esabınan májbúriy buzıw hám jer maydanın jaramlı jaǵdayǵa keltiriw belgilengen.
Usı qarar boyınsha shıǵarılǵan orınlaw hújjeti Májbúriy orınlaw byurosı Beruniy rayonı bóliminiń is júrgiziwine kelip túsip, bólim mámleketlik orınlawshısı tárepinen orınlaw háreketlerine kirisilgen.
Sonıń ishinde, juwapkerge nızamsız qurılmalardı óz esabınan buzıwı kerek ekenligi, sud qararınıń orınlanıwın támiyinlemew aqıbetleri haqqında bir neshe márte túsinikler hám eskertiwler berilgen.
Soǵan qaramastan, juwapker tárepinen nızamsız qurılmalar ıqtıyarlı túrde saplastırılmaǵan.
Sol sebepli, nızamsız qurılma arnawlı texnika quralları járdeminde usı jıldıń 17-yanvar kúni májbúriy buzıp taslanǵan.

Qaraqalpaqstan xabar agentligi.