Yaponiyanıń abıraylı «Koutaru Kai – Joho Bencha» kompaniyasınıń direktorı Kai Koutaro respublikamızǵa xızmet saparı menen kelip, Berdaq atındaǵı Qaraqalpaq mámleketlik universitetine boldı.
Sapar sheńberinde miyman universitet rektorı B.Jollıbekov penen ushırasıp, óz-ara birge islesiw máseleleri boyınsha sáwbetlesti.
Ushırasıw dawamında studentlerdi shet tillerge, atap aytqanda, yapon tiline oqıtıw, olardı xalıqaralıq mamanlıq hám til imtixanlarına tayarlaw, sonday-aq, Yaponiya kompaniyalarında tikkeley jumıs penen támiyinlew máseleleri dodalandı. Tárepler kadrlar tayarlaw procesin xalıqaralıq miynet bazarınıń talaplarına beyimlestiriw, studentlerdiń kásiplik hám ámeliy kónlikpelerin rawajlandırıw boyınsha pikirlesti. Bul birge islesiw baǵdarlaması student-jaslarǵa joqarı mamanlıqtaǵı jumıs tájiriybesin arttırıw, xalıqaralıq jumıs ortalıǵı, miynet tártibi hám korporativ mádeniyat penen jaqınnan tanısıw imkaniyatın beredi. Sonıń menen birge, jas qánigelerdiń sırt elde arttırǵan bilim hám tájiriybelerin keleshekte elimizdiń rawajlanıwı, ekonomikası hám óndiris tarawlarında nátiyjeli qollanıwı ushın bekkem tiykar jaratadı.
Ushırasıw juwmaǵında tárepler óz-ara paydalı birge islesiwdi jolǵa qoyıw, qospa joybarlardı ámelge asırıw hám studentlerdiń xalıqaralıq miynet bazarına shıǵıw imkaniyatların keńeytiwge kelisip aldı. Bunday baslamalar Qaraqalpaq mámleketlik universitetiniń xalıqaralıq baylanısların bunnan bılay da bekkemlewge, zamanagóy hám básekige shıdamlı kadrlar tayarlawǵa xızmet etetuǵını atap ótildi.

Qaraqalpaqstan xabar agentligi