Berdaq atındaǵı Qaraqalpaq mámleketlik akademiyalıq muzıkalı teatrında “Ózbekstan Respublikası Prokuraturası uyımları xızmetkerleri kúni” múnásibeti menen saltanatlı ilaj ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, kásiplik bayramı múnásibeti menen taraw pidayıları hám veteranların qutlıqladı.
Atap ótilgenindey, elimizde Prezidentimizdiń basshılıǵında xalqımızdıń tınıshlıǵın hám abadan turmısın támiyinlew, aymaqlardı sociallıq-ekonomikalıq rawajlandırıw, jınayatshılıq hám huqıqbuzarlıqqa, sonday-aq, korrupciyaǵa qarsı gúresiw, nızam ústinligin támiyinlewde ayrıqsha orınǵa iye prokuratura uyımlarınıń jumıs nátiyjeliligin jáne de arttırıw baǵdarında keń kólemli jumıslar ámelge asırılmaqta.
Álbette, bunday ilajlar nátiyjesinde eń tiykarǵı baylıǵımız esaplanǵan tınıshlıq hám milletler aralıq doslıqtı saqlaw, puqaralardıń erkinligi hám nızamlı máplerin qorǵaw, jınayatshılıq hám huqıqbuzarlıqlardıń aldın alıw, isbilermenlerdi qollap-quwatlaw hám basqa da xalıq iygiligi jolında ámelge asırılıp atırǵan jumıslarda taraw wákilleri pidákerlik penen jumıs alıp barmaqta.
Ótkerilgen ilajda mine, usınday joqarı pazıyletli jumıslar keń túrde sóz etildi. Sonday-aq, bir topar taraw wákilleri hám veteranları Qaraqalpaqstan Respublikası Joqarǵı Keńesi Prezidiumınıń qararı tiykarında húrmetli ataq, kókirek belgileri hám “Húrmet jarlıǵı” menen sıylıqlandı.
Sonday-aq, Ózbekstan Respublikası Bas prokurorınıń buyrıǵına tiykarlanıp bir topar qatardaǵı xızmetkerler arnawlı dáreje, bahalı sawǵalar menen xoshametlendi.
Ilaj dawamında “Prokurordıń bir kúni” saxnalıq shıǵarması jıynalǵanlardıń itibarına usınıldı.

Qaraqalpaqstan xabar agentligi