Parlamenttegi oppoziciya – Ózbekstan Xalıq demokratiyalıq partiyası frakciyasınıń 2025-jılǵı jumıs juwmaqları hám usı jıl ushın tiykarǵı wazıypalar boyınsha brifingi ótkerildi.
Ózbekstan XDP frakciyası tárepinen partiyanıń saylawaldı baǵdarlamasında alǵa qoyılǵan ideyalar menen baslamalardı ámelge asırıw baǵdarında, sociallıq tarawǵa baylanıslı normativlik-huqıqıy hújjetlerdi jetilistiriw, saylawshılar menen pikirlesiwdi kúsheytiw, orınlarda puqaralardı oylandırıp kiyatırǵan sistemalı mashqalalardı tallap barıw, atqarıw uyımlarınıń jumısı ústinen parlamentlik qadaǵalawdı ornatıw boyınsha bir qatar jumıslar ámelge asırıldı.
Esap beriw dáwirinde nızamlardı dodalawlarda alternativ usınıslar beriw, partiya elektoratınıń dawısın parlamentke hám húkimetke jetkeriw, mámlekette kúshli sociallıq siyasattı izbe-iz dawam ettiriw, húkimet tárepinen Nızamshılıq palatasına kirgizilip atırǵan Mámleketlik baǵdarlamalar hám Byudjet joybarınıń tastıyıqlanıwı hám orınlanıwı támiyinleniwi jáne nızam joybarlarınıń elektorat máplerine tikkeley xızmet etiwine erisiw máselelerine ayrıqsha itibar qaratıldı.
Atap ótilgenindey, Ózbekstan Respublikası Prezidentiniń Múrájatında belgilengen sociallıq máseleler, bárinen burın, insan turmısınıń eń tiykarǵı tarawların qamtıp aladı. Bántlik, kámbaǵallıqtı qısqartıw, bilimlendiriw hám medicinanıń sapasın arttırıw, máhálleniń jámiyettegi ornın bekkemlew, eń tiykarǵısı, sociallıq turaqlılıqtı bekkemlew sıyaqlılar partiya hám frakciyanıń siyasiy maqsetleri menen únles bolıp, frakciya bul reformalardıń nátiyjeliliginde tikkeley qatnasadı.
Brifingte frakciya elektorat máplerin izbe-iz qorǵaw jolında sol qanat partiya frakciyası sıpatında parlamentte óziniń siyasiy poziciyasın qatań bildirip baratuǵını málim etildi.

Muhtarama Komilova, ÓzA