Búgingi kúnde xalıqtı taza ishimlik suwı menen támiyinlew eń áhmiyetli mashqalalardan birine aylandı.
Qánigelerdiń atap ótiwinshe, dúnya boyınsha suwǵa bolǵan talap barǵan sayın artıp barmaqta. Bul bolsa suwdan aqılǵa uǵras hám únemlep paydalanıwdı talap etedi. Biraq búgin kópshilik watanlaslarımız suwdı ısırap etip atırǵanın, onnan nadurıs paydalanıp atırǵanın kóremiz. Onıń qádirin bolsa suwǵa mútáj, suwsız aymaqlarda jasap atırǵan adamlar jaqsı biledi. Jáhán densawlıqtı saqlaw shólkeminiń sońǵı maǵlıwmatlarına bola, búgin planetamızdıń 2,2 milliardtan aslam xalqı ishimlik suwı jetispeytuǵın sharayatta jasamaqta.
Házirgi waqıtta Qaraózek rayonı xalqın taza ishimlik suwı menen támiyinlewge ayrıqsha itibar qaratılıp, bul baǵdarda anıq mánzilli jumıslar alıp barılmaqta.
Álbette, mámleketimiz hám húkimetimiz tárepinen xalıqtı taza ishimlik suwı menen támiyinlew boyınsha barlıq ilajlar kórilmekte. Mámleketlik arnawlı qárejetler esabınan “Qoybaq” awıl puqaralar jıyınında bahası 660 million sumlıq joybar ámelge asırıldı. Joybar sheńberinde rayonnıń Gúzbergen, Daǵar, Xoja awıllarında kishi kólemli suwdı dushshılandırıwshı úskeneler qurılıp, xalıqtıń úylerine shekem ishimlik suw tarmaqları tartıldı.
“Qoybaq” awılı rayon orayınan 50 kilometr uzaqlıqta bolıp, 236 shańaraqta 1050 den aslam xalıq jasaydı.
– Awıl xalqı kóp jıllardan berli taza ishimlik suwı mashqalasınan qıynalıp kiyatır edi, – deydi P.Uteniyazova. – Usı kúnge shekem awıllaslarım tiykarınan qoldan islengen “kachalka” arqalı máhállemizdiń jer astı suwların hám alıs aymaqlardan kólik jallap, suw iship keletuǵın edi. Prezidentimizdiń qararına tiykarlanıp 2025-jılı máhállemizge taza ishimlik suwı kirip keldi. Shańaraqlarımızdıń dárwazasına shekem qubır tartıldı. Suw basımı jaqsı. Taza ishimlik suwınan ráhátlenip atırmız.

Qaraqalpaqstan xabar agentligi.