Qaraqalpaqstan Respublikasında tutınıwshılardıń huqıqların qorǵaw máselesi xalıqtıń kúndelikli turmısı menen tikkeley baylanıslı áhmiyetli baǵdarlardan biri bolıp qalmaqta.
Haqıyqatında da, Básekini rawajlandırıw hám tutınıwshılardıń huqıqların qorǵaw komitetine ótken 2025-jıl dawamında puqaralardan jámi 1 385 múrájat kelip túskeni tarawda mashqalalar elege shekem bar ekenliginen derek beredi.
Múrájatlar tolıq úyrenilip, kórilgen ilajlar nátiyjesinde tutınıwshılardıń paydasına 8 milliard sumnan aslam qarjı qayta esap-sanaq etildi. Bul bir tárepten, puqaralardıń óz huqıqların talap etiwde jedellesip atırǵanın kórsetse, ekinshi tárepten, ayırım xızmet kórsetiwshi hám sawda subektleri tárepinen nızam talaplarına elege shekem jeterli dárejede itibar berilmey atırǵanın ańlatadı.
Demek, múrájatlar sanınıń azayıwı tek ǵana qadaǵalaw ilajların kúsheytiw menen emes, al isbilermenlik subektleri arasında huqıqıy mádeniyattı arttırıw, tutınıwshınıń mápin húrmet etiw principlerin turmısqa tereń engiziw arqalı támiyinleniwi maqsetke muwapıq. Sebebi mashqala múrájat arqalı sheshilgeninen góre, onıń aldın alıw jámiyet ushın bir qansha paydalı.

Nigora Rahmonova, ÓzA