Respublikamızdıń barlıq aymaqlarında bolǵanı sıyaqlı, Kegeyli rayonında da xalıqtı hám awıl xojalıǵın dizimge alıw ilajınıń birinshi basqıshı – onlayn dizimnen ótiw processleri baslandı.
Xalıqtıń bul processke jedel tartılıwın támiyinlew, túsindiriw hám úgit-násiyatlaw jumısların kúsheytiw maqsetinde, Kegeyli rayonına biriktirilgen Respublikalıq jumısshı topar wákilleri rayon hákimi Aybek Kamalov basshılıǵındaǵı shtab aǵzaları menen birgelikte mámleketlik uyımlar hám shólkemlerge barıp, dizimge alıw processleri menen jaqınnan tanıstı.
Jumıslardı úyreniw dawamında dizimge alıw jumısların nátiyjeli shólkemlestiriw, adamlardıń ótiw tártibi hám basqıshların durıs muwapıqlastırıw, aymaqlıq komissiyalar hám uchastkalardıń jumısın jedellestiriw boyınsha tiyisli usınıs hám kórsetpeler berildi.
Álbette, alıp barılıp atırǵan bul jumıslar dizimge alıw isleriniń shólkemleskenlik penen ótiwine óziniń unamlı tásirin kórsetedi. Jumısshı topar wákilleri hám arnawlı dúzilgen shtab aǵzaları tárepinen respublikamızdıń barlıq aymaqlarında bul baǵdardaǵı isler qızǵın dawam etpekte.

Adilbay Orazov,
Qaraqalpaqstan xabar agentligi sholıwshısı.