Densawlıqtı saqlaw ministrliginiń baslaması menen ótkerilip atırǵan “Salamat turmısqa qaray!” salamatlıq marafonı Beruniy rayonı medicina birlespesiniń kóp tarmaqlı poliklinikasında bolıp ótti.
Usı jıldıń 1-31-yanvar kúnleri ótkerilip atırǵan bul akciya keselliklerdiń aldın alıw hám salamat turmıs tárizin úgit-násiyatlawǵa qaratılǵan.
Marafon aymaqtaǵı shańaraqlıq poliklinikalarda dawam etip, Respublikalıq qánigelestirilgen medicina oraylarınıń jetekshi shıpakerleri hám jergilikli medicina xızmetkerleri tárepinen xalıqtıń barlıq qatlamı biypul medicinalıq tekseriwden ótkerilmekte.
Usı tiykarda keselliklerdi erte basqıshta anıqlaw hám nátiyjeli emlew boyınsha zárúr usınıslar berilmekte. Óz gezeginde tekseriw nátiyjeleri zamanagóy málimleme sistemaları arqalı birden-bir elektron bazaǵa kirgizilip, keleshekte nawqaslardıń salamatlıǵı turaqlı monitoring etip barıladı.
Sonday-aq, Beruniy rayonınıń xalıq kóp jıynalatuǵın orınlarında “Salamatlıq maydanları” shólkemlestirilip, bul mánzillerde salamat turmıs tárizi hám durıs awqatlanıwdı úgit-násiyatlawǵa baylanıslı hár qıylı akciyalar shólkemlestirilmekte.

Qaraqalpaqstan xabar agentligi