Nókis qalasında eki kún dawamında puqaralıq jámiyetiniń regionallıq muwapıqlastırıwshı forumı bolıp ótti.
Evropa Awqamı menen birgelikte qarjılandırılıp atırǵan “Ózbekstanda inklyuziv jámiyetlik rawajlanıw ushın puqaralıq jámiyetiniń imkaniyatların keńeytiw” joybarı Konrad Adenauer qorınıń Ózbekstandaǵı wákilxanası, milliy sherik – “Yuksalish” háreketi menen birgelikte shólkemlestirilgen bul ilajdıń intensiv jumısshı sessiyalarında 50 ge shamalas mámleketlik emes kommerciyalıq emes shólkemlerdiń hám yuridikalıq klinikalardıń wákilleri, sonday-aq, belsendi jaslar hám puqaralar qatnastı.
Forumnıń tiykarǵı maqseti – Qaraqalpaqstan Respublikasında Puqaralıq jámiyeti shólkemleriniń institucionallıq hám tarawlıq potencialın arttırıw, olardıń jergilikli dárejedegi áhmiyetli rawajlanıw mashqalaların (ásirese, jaslar hám hayal-qızlar máselelerinde) sheshiwdegi rolin kúsheytiw, sonday-aq, puqaralıq jámiyeti shólkemleri, universitetler hám mámleketlik strukturalar arasında óz-ara birge islesiw hám bilim almasıw ushın platforma qáliplestiriwden ibarat.
Forumda «Yuksalish» háreketiniń atqarıwshı direktorı A.Mamatxanov, Qaraqalpaqstan Respublikası aymaqlıq bóliminiń baslıǵı T.Romanov, Konrad Adenauer qorınıń Oraylıq Aziyadaǵı regionallıq baǵdarlamasınıń basshısı Andre Algermissen hám basqalar shıǵıp sóylep, joybardıń wazıypaları, Ózbekstannıń rawajlanıwındaǵı roli, Qaraqalpaqstan Respublikasında puqaralıq jámiyeti shólkemleri jumıslarınıń nızamshılıq bazasınıń áhmiyetli máselelerine keńnen toqtap ótti.
Forum dawamında qatnasıwshılar maqsetli aymaqlarda hayal-qızlardıń huqıqları, jaslar bántligi hám sociallıq inklyuziya sıyaqlı áhmiyetli máseleler boyınsha islenip atırǵan jumıslardaǵı bar kemshiliklerdi anıqlaw ushın pikir alısıp, Qashqadárya hám Ferǵana wálayatlarınan onlayn qatnasıp atırǵan puqaralıq jámiyeti shólkemleriniń tabıslı joybarları hám aldınǵı ámeliyatları tuwralı maǵlıwmatlar aldı.
Sessiyalarda dus kelip atırǵan shólkemlestiriwshilik, finanslıq, esabat tapsırıw hám normativlik máselelerdegi qıyınshılıqlardı saplastırıw ushın tájiriybeli ekspert sheshimlerin usınıw, universitetler, yuridikalıq klinikalar, ǴXQ hám jeke menshik sektor wákillerin tartıw arqalı birge islesiw ushın jańa imkaniyatlardı qáliplestiriw, usı joybar sheńberindegi baǵdarlamalarda qatnasıw ushın arza tapsırıwdıń maqsetleri, shártleri hám texnikalıq talapların tolıq túsindiriw sıyaqlı tiykarǵı wazıypalarǵa itibar qaratıldı.
Forum baǵdarlaması Qaraqalpaqstan Respublikasındaǵı sociallıq mashqalalar hám olardı sheshiw boyınsha puqaralıq jámiyeti shólkemleriniń usınısları hám ilajları, hayal-qızlar hám jaslardı qamtıp alıwshı tiykarǵı mashqalalardı talqılaw, sonday-aq, usı mashqalalardı sheshiwde puqaralıq jámiyeti shólkemleriniń nátiyjeliligin arttırıw jolların kórip shıǵıw sıyaqlı tiykarǵı tematikalıq bloklar hám dodalawlardı óz ishine aldı.
Ilajda qatnasıwshılar óz jumısın kúsheytiw ushın ámeliy bilim hám qurallarǵa iye bolıp, regionallıq baslamalar sheńberinde jáne de nátiyjeli birge islesiwge xızmet etetuǵın jańa sheriklik baylanısların qáliplestiriw imkaniyatın aldı.
Forum dawamında qatnasıwshılar qánigelerden ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.