Qıtaylı qánigeler ata-anaları menen birge kitap oqıǵan mektepke shekemgi jastaǵı balalarda til hám sociallıq-emocionallıq kónlikpeler jaqsı rawajlanatuǵının anıqladı. Bul haqqında Computers in Human Behavior jurnalı jazbaqta.
Izertlewde Lanchjou qalasındaǵı baqshalardıń úsh jastan altı jasqa shekemgi 202 tárbiyalanıwshısı hám olardıń ata-anaları qatnastı. Balalar qansha waqıttı ekran aldında ótkeriwi, ata-anası menen kitap oqıwı yamasa olar menen birge oynawı atap ótildi.
“Ekran arqalı aǵartıwshılıq hám kewilashar kontent, sonday-aq, erkin hám birgelikte tamasha etiwge mólsherlengen baǵdarlamalar kórsetildi. Balalardıń rawajlanıw dárejesi til kónlikpeleri, sezimler hám sociallıq normalardı túsiniw boyınsha standartlastırılǵan testler járdeminde bahalandı”, – dep jazǵan basılım.
Izertlew juwmaǵına bola, ata-anaları menen kóbirek kitap oqıǵan balalarda til rawajlanıwı hám sociallıq kónlikpelerdiń joqarı kórsetkishleri atap ótildi. Ekran aldında kóp otırǵan balalarda bul kórsetkishler tómenligi baqlandı.

Qaraqalpaqstan xabar agentligi