Túrkiyanıń “TRT-Avaz” málimleme portalı Ózbekstan Qurallı Kúshleri dúzilgeniniń 34 jıllıǵına baǵıshlanǵan maqala járiyaladı, dep xabar bermekte “Dunyo” málimleme agentligi.
Maqalada atap ótiliwinshe, 14-yanvar – Watan qorǵawshıları kúni Ózbekstanda 1993-jıldan berli belgilenip kelinedi. Bul sáne tek ǵana áskeriy xızmetkerler emes, al mámlekettiń tınıshlıǵı hám qáwipsizligin támiyinlewshi barlıq strukturalar hám veteranlar ushın ayrıqsha áhmiyetke iye.
– Tashkenttiń tiykarǵı kósheleri boylap áskerler áskeriy marsh hawazına únles, isenimli qádem taslap bardı, – dep jazǵan tuwısqan eldiń basılımı. – Áskeriy qáwipsizlik hám qorǵanıw universiteti aymaǵınan baslanǵan paradta oficerler, tarawǵa qánigelesken bilimlendiriw mákemeleriniń tıńlawshıları, Qurallı Kúshlerdiń hár qıylı bólimleri hám atlı áskerler qatnastı. Paytaxt xalqı áskeriy demonstraciyanı qızıǵıwshılıq penen baqladı.
Sonday-aq, maqalada 1992-jılı parlament qararı menen Ózbekstan aymaǵında jaylasqan barlıq áskeriy bólim hám strukturalar respublika qaramaǵına ótkerilgeni, áyne usı kún Oraylıq Aziyadaǵı eń kúshli armiyalardan biriniń qáliplesiw sánesi sıpatında tariyxta qalǵanı atap ótilgen.

F.YaXShIBOEVA, ÓzA