Ótken jılı barlıq tarawlar qatarında sociallıq qorǵaw sistemasında da joqarı nátiyjelerge erisildi. Atap aytqanda, reabilitaciya xızmetleriniń sapasın arttırıw, mayıplıqtı belgilewde birden-bir elektron platforma engiziliwi usılardıń qatarına kiredi. Bunda xalıqaralıq birge islesiwler hám ózlestirilgen tájiriybelerdiń de ornı ayrıqsha. Sonı esapqa alǵan halda usı jılı da xalıqaralıq birge islesiwlerdiń sanı artıwı rejelestirilgen.
Sociallıq qorǵaw milliy agentligi basshılıǵı Qıtay Xalıq Respublikasınıń Ayrıqsha hám tolıq huqıqlı elshisi – Yuy Czyun menen ushırasıw ótkerip, eki tárepleme birge islesiwdiń házirgi jaǵdayı haqqında pikir alıstı hám xalıqtı sociallıq qorǵaw ilajların jáne de tereńlestiriw baǵdarları boyınsha dodalawlar alıp bardı.
Sóylesiwler dawamında insan potencialın rawajlandırıw, mayıplıǵı bolǵan shaxslardı reabilitaciyalaw, sonday-aq, balalardı zorlıq hám basqa túrdegi kemsitiwlerden qorǵaw tarawındaǵı birge islesiw perspektivalarına ayrıqsha itibar qaratıldı.
Bunnan tısqarı, Qıtaydıń mayıplıǵı bolǵan shaxslarǵa sociallıq-reabilitaciya xızmetlerin kórsetiw, sociallıq qorǵaw mákemelerin awqat penen támiyinlew sistemasın qáliplestiriw hám basqa da ámeliy baǵdarlardaǵı aldınǵı tájiriybesin úyreniw hám ámeliyatqa engiziw boyınsha pikir alısıldı.
Ushırasıw sońında tarawdı jáne de rawajlandırıw maqsetinde tiykarǵı sociallıq joybarlardı ámelge asırıw ushın grant qarjıların tartıw máseleleri kórip shıǵılıp, Qıtaydıń qánigelesken qorları, qayırqomlıq shólkemleri hám xalıqaralıq rawajlanıwǵa járdem mexanizmleriniń tájiriybe-sınaq baslamaların qarjılandırıwda qatnasıw imkaniyatları dodalandı.
Doslıq ruwxında alıp barılǵan sóylesiwler hár eki tárep ushın da keleshekte paydalı birge islesiwlerdiń dawam etiwinen derek berdi, desek aljaspaǵan bolamız.

Sherbek Islomov, ÓzA