Qurama Shtatlar Tramp jónelisi joybarın (TRIPP) ámelge asırıw ushın Armeniya-Amerika qospa kárxanası “TRIPP Development Company”diń qadaǵalaw úlesin aladı. Bul haqqında Mámleketlik departamenttiń baspasóz xızmeti Mámleketlik xatker Marko Rubio hám Armeniya sırtqı isler ministri Ararat Mirzoyan arasında Vashingtonda bolıp ótken ushırasıwdan soń birgeliktegi bildiriw járiyaladı.
Qurama Shtatlar joqarıda aytıp ótilgen shirkettegi úlesiniń 74 procentine, Armeniya bolsa 26 procentine iyelik etedi. Erevannıń úlesi keyin ala 49 procentke shekem jetiwi múmkin. “TRIPP Development Company”transport infrastrukturasın rawajlandırıw huqıqın 49 jıl múddetke aladı, keyin kelisim 50 jılǵa sozılıwı múmkin.
Atap ótiliwinshe, TRIPP “Armeniya ishindegi anıq tranzit jónelisleri sheńberinde, keleshekte tolıq bayan etiletuǵın orınlarda, Armeniyanıń barlıq joybar aymaqları ústinen tolıq suverenitetin saqlap qalǵan halda islep shıǵılıwı” kerek.
Táreplerdiń bildiriwine bola, Qurama Shtatlar joybardı Qubla Kavkazda tınıshlıqtı bekkemlew, sawdanı keńeytiw hám támiynat shınjırınıń turaqlılıǵın bekkemlew, sonıń ishinde, áhmiyetli mineral hám shiyki zatlardı qolǵa kirgiziw quralı sıpatında kórmekte. Sonday-aq, bul baslama Amerika investiciyası hám biznesi ushın jańa bazarlar ashıw, Evropa hám Aziya arasında qosımsha sawda jolların jaratıwdı názerde tutadı.
Armeniya ushın TRIPP “regionallıq tranzit hám ekonomikalıq oray sıpatındaǵı statusın bekkemlew, sırt el investiciyasın tartıw, eksport potencialın keńeytiw hám jańa jumıs orınların jaratıw imkaniyatı” sıpatında tán alınbaqta. Sonday-aq, qospa kárxanalar, texnologiyalar transferi hám jergilikli qánigeler ushın tájiriybe arttırıwdı rawajlandırıw rejesi de bar.
Ótken jılı 8-avgust kúni Vashingtonda Prezident Donald Tramp penen úsh tárepleme ushırasıwdan soń Armeniya Bas ministri Nikol Pashinyan hám Ázerbayjan Prezidenti Ilham Áliev Baku hám Erevan arasında tınıshlıq ornatıp, ulıwma transport koridorın jaratıw boyınsha birgeliktegi deklaraciyaǵa qol qoyǵan edi.

S.Rahimov, ÓzA