Orınlardaǵı hár qıylı mashqalalardı úyrenip, sheshiw, puqaralardıń dártin tıńlaw, lawazımlı shaxslardıń óz jumısın nátiyjeli alıp barıwına úles qosıw xalıq wákilleriniń áhmiyetli wazıypalarınan bolıp esaplanadı. Onda olar ózlerine berilgen wákillik hám imkaniyatlar sheńberinde jámiyetlik hám deputatlıq qadaǵalaw institutlarınan nátiyjeli paydalanıwı kerek. Sonda ǵana aymaqlarda belgili nátiyjelerge erisiw múmkin.
Ózbekstan Xalıq demokratiyalıq partiyası Qaraqalpaqstan Respublikası Keńesi tárepinen “Ózbekstan Respublikası Prezidentiniń Oliy Majlis hám Ózbekstan xalqına Múrájatınıń mazmun-mánisi jáne onda belgilengen tiykarǵı wazıypalardı ámelge asırıwda wákillikli uyımlardıń roli” atamasında seminar ótkerildi.
Ilajda partiyanıń Qaraqalpaqstan Respublikası Keńesiniń Baslıǵı, Qaraqalpaqstan Respublikası Joqarǵı Keńesindegi partiya frakciyasınıń baslıǵı Xalilla Eshimbetov “Prezident Múrájatı – jámiyetlik-siyasiy reformalardıń strategiyalıq jol kartası” atamasında bayanat jasap, búgingi kúnde deputatlar aldında turǵan tiykarǵı wazıypalar, ideya hám baslamalardı júzege shıǵarıwda partiya toparlarınıń rolin arttırıw máselesine toqtap ótti. Atap aytqanda, múrájatlar menen islesiw, deputatlıq qadaǵalawdıń eń áhmiyetli túri bolǵan deputatlıq soraw institutınan belsene paydalanıw zárúr ekenligi atap ótildi.
– Búgingi kúnde Qaraqalpaqstan Respublikası Joqarǵı Keńesinde partiyanıń 11 deputatı jumıs alıp barmaqta. Olar ótken 2025-jıl dawamında xalıqtan kelip túsken áhmiyetli jámiyetlik-siyasiy máseleler boyınsha jámi 86 deputatlıq soraw jibergen bolıp, sonnan 86 sına da unamlı sheshim tapqan. Rayonlıq hám qalalıq Keńeslerde partiyanıń 82 deputatı bolıp, olar ótken jıl dawamında jibergen 663 deputatlıq sorawdan 608 i nátiyjeli sheshilgen, – deydi X.Eshimbetov. – Bunnan tısqarı, partiyanıń jámiyetlik qabıllawxanalarına kelip túsken 1 mıń 473 múrájattıń derlik 90 procenti óz sheshimin tapqan.
Tallawlar aymaqtaǵı deputatlıq toparlardıń jumısı sistemalı jolǵa qoyılǵanın, xalıqtan kelip túsken múrájatlar óz sheshimin tawıp atırǵanın kórsetpekte. Biraq deputatlıq toparlar sociallıq tarawǵa juwapker uyımlar hám shólkemler juwapkerleriniń esapların tıńlaw, sol arqalı tásirsheń ilajlar belgilew baǵdarında intakerlikti arttırıw zárúr ekenligi atap ótildi. Sonıń menen birge, Múrájatta belgilengen deputat sorawlarınıń orınlanıwı hár sherekte tallanıp barılıwı máselesine de ayrıqsha toqtap ótildi.
Seminarda xalıq wákilleriniń ámeliy jumısın bunnan bılay da izbe-iz hám nátiyjeli shólkemlestiriw máselesine ayrıqsha itibar qaratıldı. Jıynalǵanlarǵa kópti kórgen, úlken tájiriybege iye partiyanıń pidayı juwapkerleri ózleriniń uzaq jıllıq tájiriybelerinen kelip shıqqan zárúr usınısların bildirdi.
Májiliste Xalıq demokratiyalıq partiyasınıń baǵdarlamalıq maqsetleri solshıl ideyalarǵa tiykarlanǵanı ushın Múrájatta belgilengen kámbaǵallıqtı qısqartıw, bántlik, bilimlendiriw hám medicinalıq xızmet sapasın arttırıw sıyaqlı wazıypalardıń orınlanıwında partiya shólkemleri, tiykarǵısı, deputatlıq birlespeler jumısınıń nátiyjeliligin hám tásirsheńligin arttırıw boyınsha wazıypalar haqqında pikir alısıldı.
Múrájatta Xalıq demokratiyalıq partiyasınıń tiykarǵı baǵdarlamalıq maqsetlerinen biri bolǵan sociallıq mámleket modeliniń kelesi jıl ushın háreketler baǵdarlaması anıq belgilengen. Sol sebepli partiya úgit-násiyat jumısların izbe-iz jolǵa qoyıp, partiya shólkemleri hám deputatlıq birlespeleri aldında turǵan eń áhmiyetli wazıypalardıń orınlanıwın támiyinlewge qaratılǵan oqıw-seminarlar mámleketimizdiń barlıq aymaqlarında dawam ettirilmekte.

Qaraqalpaqstan xabar agentligi