Ózbekstan Respublikası Transport ministriniń orınbasarı I.Abdugaffarov basshılıǵındaǵı respublikalıq jumısshı topar aǵazları Bozataw rayonında bolıp, xalıqtı hám awıl xojalıǵın dizimge alıw baǵdarında ámelge asırılıp atırǵan jumıslardı úyrendi.
Eń dáslep topar wákilleri Bozataw rayonı hákimliginde xalıqtı hám awıl xojalıǵın dizimge alıw processlerin nátiyjeli shólkemlestiriw maqsetinde dúzilgen arnawlı shtab jumısları menen jaqınnan tanısıp, shtab aǵzaları menen sáwbetlesti hám bar bolǵan mashqalalardı saplastırıw, jumıslardı nátiyjeli shólkemlestiriw, juwapker xızmetkerlerge ámeliy járdem kórsetiw boyınsha tiyisli tapsırmalar berdi.
Sonday-aq, usı kúni rayondaǵı 1-sanlı ulıwma orta bilim beriw mektebinde rayon hákimi B.Ubbiniyazov, Ózbekstan Respublikası Transport Ministriniń orınbasarı I.Abdugaffarov hám rayon Ishki isler bólimi baslıǵı U.Kurbanbaevalar menen birgelikte aymaqta jasawshı puqaralardıń múrájatların úyreniw hám olarǵa unamlı sheshim tabıw maqsetinde gezektegi kóshpeli qabıllawı bolıp ótti.
Ótkerilgen kóshpeli qabıllawǵa tiyisli taraw wákilleri hám aymaq turǵınları qatnastı. Qabıllaw dawamında puqaralar tárepinen transport xızmeti, ishki jollardı ońlaw hám basqa da turmıslıq mashqalalarǵa baylanıslı bolǵan múrájatlar kelip tústi.
Puqaralar tárepinen bildirilgen bir qatar múrájatlardıń ayırımları sol jerdiń ózinde qanaatlandırılıp, sheshimi waqıt talap etiletuǵınlarına unamlı sheshim tabıwı ushın tiyisli juwapkerlerge anıq tapsırmalar belgilep berildi.

Adilbay Orazov,
Qaraqalpaqstan xabar agentligi sholıwshısı