Jańa jıldıń baslanıwı menen mámleketimiz sportshıları ózleriniń aldaǵı bolatuǵın jarıslarına tayarlıqların baslap jiberdi. Atap aytqanda, ótken jılı futbol boyınsha Saudiya Arabstanında ótkerilgen 17-jasqa shekemgi komandalar arasında ótkerilgen Aziya kuboginde altın medaldı qolǵa kirgizgen Ózbekstan saylandı komandası ózleriniń oqıw-shınıǵıw jıyınların Túrkiyada baslap jiberdi.
Oqıw-shınıǵıw jıyınları sheńberinde olar túrkiyalı jas óspirimler menen eki márte ushırastı. Oǵada qızıqlı ótken oyınlardıń birinshisinde maydan iyeleri 3:2 esabında jeńgen bolsa, ekinshi oyında saylandı komandamız aǵzaları 2:0 esabında jeńiske eristi.
Áhmiyetli tárepi sonda, bul oyınlarda «Aral» futbol klubı tárbiyalanıwshıları Nurbek Sársenbaev hám Azizbek Erimbetovlar oyınǵa túsip, komandamızdıń jeńiske erisiwine ózleriniń salmaqlı úleslerin qostı.

Adilbay Orazov,
Qaraqalpaqstan xabar agentligi sholıwshısı