Mámleketimiz basshısınıń baslaması tiykarında “Ózbekstan – 2030” strategiyası jetilistirilmekte.
Strategiya joybarınıń “Nızam ústinligin támiyinlew, xalıq xızmetindegi mámleketlik basqarıwdı shólkemlestiriw” baǵdarı boyınsha qanday jańalıqlar engiziledi?
“Rawajlanıw strategiyası” orayında shólkemlestirilgen baspasóz ánjumanında áne usı sorawǵa juwap berildi.
Ádillik, Sanlı texnologiyalar ministrlikleri, Basqarıw nátiyjeliligi agentliginiń juwapkerleri jurnalistlerge óz baǵdarları sheńberinde islengen hám ámelge asırılıwı rejelestirilip atırǵan máseleler haqqında maǵlıwmat berdi.
“Rawajlanıw strategiyası” orayınıń atqarıwshı direktorı Eldor Tulyakov strategiya joybarın dodalawda keń jámiyetshiliktiń belsene qatnasıp atırǵanı hújjettiń jáne de jetik hám xalıqshıl bolıwın támiyinleytuǵının atap ótti.
Ádillik ministrligi departament baslıǵı Eldor Mahkamov mámleketlik basqarıw hám mámleketlik xızmetler tarawında nátiyjelilikti arttırıw arqalı xalıqqa qolaylıq jaratılıp atırǵanın atap ótti. Mámleketlik basqarıw hám mámleketlik xızmetlerdi kórsetiw sistemasın tolıq sanlastırıw sheńberinde arxiv materiallarınıń sanlastırılǵan úlesi 80 procentke jetkeriledi. 40 million hújjetten 25 millionın sanlastırıw rejelestirilmekte.
Jergilikli mámleketlik hákimiyat atqarıw uyımlarınıń xalıqtıń máplerine baylanıslı bolǵan wákilliklerin ámelge asırıwda “byurokratiyanı nolge túsiriw” principi 100 procentke jetkeriledi.
Sociallıq-ekonomikalıq, qurılıs hám energetika, insan resursları, salıq, bajıxana hám xalıqtı jumıs penen támiyinlew sıyaqlı tarawlarǵa baylanıslı 20 dan aslam elektron sistemalar hákimlikler jumısına engiziledi.
Sanlı texnologiyalar ministrliginiń wákilleri sanlı mámleketlik basqarıwdı kompleksli rawajlandırıw, jámiyetlik qadaǵalawdı kúsheytiw hám mámleketlik xızmetlerdi birden-bir sanlı ortalıq tiykarında shólkemlestiriw – tiykarǵı maqset ekenin atap ótti. Bul ashıq-aydınlıq, nátiyjeliliktiń tiykarǵı faktorı bolıp, xalıq hám isbilermenler ushın keńnen qolaylıq jaratadı.
Puqaralardıń múrájatı hám jámiyetlik qadaǵalaw mexanizmlerin kúsheytiw maqsetinde “Xalıq qadaǵalawı” portalı hár bir aymaqta 100 procent engiziledi. Mámleketlik xızmetlerdi birden-bir ekosistema tiykarında shólkemlestiriw ushın “Sanlı húkimet” sistemasınıń birden-bir platformasına jalǵanǵan servisler sanı 700 ge jetkeriledi.
Basqarıw nátiyjeliligi agentligi departament baslıǵı Ǵolibjon Abduazizov mámleketlik basqarıw sistemasın jetilistiriw – onı zamanagóy talaplar tiykarında rawajlandırıwǵa qaratılǵanın atap ótti.
Hár jılı on respublikalıq atqarıwshı hákimiyat uyımlarınıń ishki is júrgiziw processleri basqıshları (hújjetlerdi kelisiw, qol qoyıw, maǵlıwmat almasıw hám basqa da processler) 5 procentke optimallastırıladı. Dástúriy túrde ámelge asırılıp atırǵan tártip-qaǵıydalardıń keminde 10 procenti sanlastırıladı. Sol arqalı bul processlerde qaǵaz jumsalıwın qısqartıw, mámleketlik puqaralıq xızmetiniń basqarıw hám qánige kadrlar kategoriyasındaǵı lawazımlardı ielewdi 100 procent mamanlıq dárejesine tiykarlanǵan karera modeli boyınsha tańlawlar arqalı ámelge asırıladı.
“Edu.argos.uz” aralıqtan bilimlendiriw platforması arqalı mámleketlik puqaralıq xızmetkerlerdiń onlayn tájiriybe arttırıw qamtıp alıwı 100 procentke jetkeriledi. “Mámleketlik xızmetker” mobil qosımshasınan paydalanıp atırǵan mámleketlik puqaralıq xızmetkerleriniń úlesi 100 procentke jetkeriledi.
Baspasóz ánjumanı juwmaǵında juwapkerler jurnalistlerdi qızıqtırǵan sorawlarǵa juwap berdi.

Norgul Abduraimova,
Asliddin Alijonov (foto), ÓzA