Elimizde awdarma tarawına qaratılıp atırǵan itibar jazıwshılarımızdıń shıǵarmaların shet tillerge awdarıw, olardı sırt el kitapqumarlarına usınıw imkaniyatın bermekte.
Belgili ózbek jazıwshısı hám dramaturgi Qwchqor Norqobil shıǵarmaları kóplegen sırt ellerde turaqlı basıp shıǵarılmaqta. Jaqında Serbiyanıń “Vrachar” baspası tárepinen dóretiwshiniń “Júrektegi bomba” kitabı basıp shıǵarıldı.
Serbiya Jazıwshılar awqamınıń aǵzası, talantlı jazıwshı, professor tárepinen serb tiline awdarılǵan bul kitapta jazıwshınıń “Kól túbinen qaytqan muhabbat” povesti hám gúrrińler dúrkimi orın alǵan.
– Qwchqor Norqobil shıǵarmalarında ózbek xalqınıń jaqsı pazıyletleri hám ózine tán xarakteri, búgingi dúnya ushın oǵada áhmiyetli bolǵan insanıy mehir-muhabbat kórinip turadı. Ásirese, urıs azapların dárt penen súwretlep atırǵan jazıwshınıń ishindegi dárt oqıwshınıń qálbinde de tınıshsızlanıw oyatadı. Jazıwshı kóplegen gúrrińlerinde barlıq xalıqlardıń ulıwma úyi – Jer sharında adamlar tınısh-tatıw jasawǵa haqılı, degen ulıwma insanıylıq ideyanı alǵa qoyadı. Bul haqqında burın da jazǵan edim, jáne tákirarlayman. Kútilmegen sheshimler hám xarakterler sheberi, ózbek jazıwshısınıń kitabı hár bir serbtiń úyine kirip barıwın qáleymen, – deydi kitap awdarmashısı Valentina Novkovich.
Haqıyqatında da, búgingi oǵada qıyın hám qáwipli dáwirde ózbek jazıwshısınıń urıstıń ayanıshlı hám qayǵılı aqıbetlerin ayqın ashıp beriwi, tınıshlıqtı saqlawǵa baylanıslı bahalı kórkem-filosofiyalıq pikirleri oqıwshını oylandıratuǵını anıq.
Aytıp ótiw kerek, bunnan aldın bul mámlekette jazıwshınıń “Kózlerińdi kóriwge keldim”, “Alıstaǵı sáykeslik” kitapları basıp shıǵarılǵan edi. Qwchqor Norqobildiń shıǵarmaları Rossiya, Belarus Respublikası hám basqa da mámleketlerde basıp shıǵarılǵan.

N.Usmonova, ÓzA