Xabarıńız bar, búgin xalıqtı hám awıl xojalıǵın dizimge alıw ilajlarına rásmiy túrde start berildi.
Usı múnásibet penen Xojeli rayonı hákimliginde bul jumıslardı sistemalı hám nátiyjeli shólkemlestiriw, júzege keliwi múmkin bolǵan máselelerdi anıqlaw hám olardı saplastırıw máselelerine baǵıshlanǵan májilis bolıp ótti.
Oǵan Ózbekstan Respublikası Ósimlikler karantini hám qorǵaw agentligi direktorı I.Ergashev, Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı A.Jumanazarov, Xojeli rayonı hákimi J.Ermashev, rayon kólemindegi mámleketlik hám jámiyetlik shólkemlerdiń basshıları, máhálle jetiligi aǵzaları, sonday-aq, jaslar qatnastı.
Májilis dawamında xalıqtı hám awıl xojalıǵın dizimge alıw ilajların joqarı dárejede shólkemlestiriwdiń áhmiyetli tárepleri, bul processlerdiń aymaqlardı sociallıq-ekonomikalıq rawajlandırıw, resurslardan aqılǵa uǵras paydalanıw, mámleketlik baǵdarlamalardı mánzilli rejelestiriw hám xalıqtıń turmıs dárejesin jaqsılawdaǵı ornı hár tárepleme talqılandı.
Sonday-aq, dizimge alıw ilajlarınıń mámleket kóleminde birden-bir maǵlıwmat bazasın qáliplestiriw, awıl xojalıǵı tarawların rawajlandırıw boyınsha anıq hám isenimli statistikalıq maǵlıwmatlardı jaratıwdaǵı áhmiyeti ayrıqsha atap ótildi. Ilaj qatnasıwshılarına dizimge alıw ilajlarınıń nızamshılıq tiykarları, shólkemlestiriw mexanizmleri hám ámeliy tárepleri boyınsha tolıq túsinikler berildi.
Májiliste juwapker shólkemlerge hám máhálle sisteması wákillerine xalıqtı hám awıl xojalıǵın dizimge alıw ilajların belgilengen múddetlerde, joqarı dárejede, sapalı hám juwapkershilik penen ámelge asırıw boyınsha tiyisli tapsırmalar berilip, óz-ara birge islesiwdi jáne de kúsheytiw zárúrligi atap ótildi.

Á.Jiyemuratov,
Qaraqalpaqstan xabar agentligi