Berdaq atındaǵı Qaraqalpaq mámleketlik universitetiniń Biologiya fakultetinde Yaponiyanıń Osaka universiteti professorı, sonday-aq, National Geographic jámiyetiniń koordinatorı Ken Ito menen ushırasıw bolıp ótti.
Ushırasıwǵa fakultet professor-oqıtıwshıları, tayanısh doktorantlar, magistrantlar hám student jaslar qatnastı.
– Ushırasıw dawamında dárilik ósimlikler, ekologiya, biologiya baǵdarındaǵı qospa joybarlardı ámelge asırıw máseleleri dodalandı, – deydi Biologiya fakulteti dekanı professor M.Jumanov. – Professor Ken Ito menen birgelikte klimat ózgeriwi, ekologiyalıq mashqalalardı úyreniw, biologiyalıq kóp túrlilikti saqlawǵa qaratılǵan xalıqaralıq joybarlardı qollap-quwatlaw, tájiriybe almasıw hám jas ilimpazlardıń imkaniyatların arttırıwdı maqset etkenbiz.
Professor fakultettiń ilimiy-bilimlendiriw infrastrukturası, kafedralar hám zamanagóy laboratoriyalar jumısı menen tanıstı. Dárilik ósimliklerdi izertlew baǵdarında alıp barılıp atırǵan ilimiy jumıslarǵa ayrıqsha qızıǵıwshılıq bildirdi. Laboratoriyalarda ótkerilip atırǵan izertlewler menen tanısıp, ol dárilik ósimliklerden nátiyjeli paydalanıw, olardıń biologiyalıq aktiv qásiyetlerin anıqlaw hám farmacevtika tarawına engiziw boyınsha pikir hám usınısların bildirdi.
Ushırasıwda, ilimiy baylanıslardı rawajlandırıw, bioekologiyalıq ilimiy izertlewler tarawlarında birge islesiw, joybarlardı birgelikte tayarlaw, xalıqaralıq tájiriybe almasıw, seminarlar hám stajirovkalar shólkemlestiriw máseleleri de dodalandı. Eki universitet arasında keleshekte birge islesiw memorandumların dúziw, birgelikte ilimiy-izertlew rejelerin islep shıǵıw, bakalavr studentleri, magistrantlar hám tayanısh doktorantlardı ilimge baǵdarlaw boyınsha birge islesiwge kelisip alındı.

Qaraqalpaqstan xabar agentligi