Qaraqalpaqstan Respublikası Joqarǵı Keńesiniń Baslıǵı Amanbay Orınbaev qala hám rayon máhállelerindegi kóshe sárdarları bolǵan belsendi jaslar menen ushırastı.
Joqarǵı Keńes Baslıǵı dáslep sońǵı jılları Prezidentimizdiń Qaraqalpaqstanǵa bolǵan ayrıqsha mehiri hám itibarı menen óz aldına qabıl etilgen qarar hám pármanlar, sonday-aq, usı tiykarda ámelge asırılıp atırǵan iygilikli jumıslar, turmısımızda keńnen en jaydırılıp atırǵan reformalardı atap ótip, ámeliy ilajlar anıq tastıyıǵı menen kórsetilip, búgingi kúnde dawam ettirilip atırǵan jumıslar, sonday-aq, aldaǵı rejeler haqqında maǵlıwmat berdi.
Prezidentimizdiń tek ǵana Qaraqalpaqstan ushın 2017-jıldan berli 78 párman hám qararları qabıl etilgenligin ayrıqsha maqtanısh penen aytıw kerek. Sonnan, házirgi waqıtta 38 hújjettiń orınlanıwı dawam etpekte. Eń tiykarǵısı, bul tariyxıy hújjetler tiykarında xalqımız turmısında burın bolmaǵan ózgeris hám jańalanıwlar júz berip atır. Turmıslıq reformalardıń ámeliy nátiyjeleri hár bir shańaraqqa kirip barmaqta.
Ótkerilgen ushırasıwda mine, usınday iygilikli ilajlar keń túrde sóz etildi.
Óz gezeginde, jaslar da ayrıqsha mehir hám itibar ushın Prezidentimizge Qaraqalpaqstanlı jaslardıń atınan tereń minnetdarshılıqların jetkeriw boyınsha Joqarǵı Keńes Baslıǵına usınıs bildirdi hám bul usınıs maqullandı.
Bunnan soń, jaslar menen jaqınnan pikirlesilip, hár bir kóterilgen másele belgilep alındı.
Ushırasıw dawamında jámiyetlik jumıslarda belsene qatnasıp, máhállelerde kópshilikke úlgi bolıp atırǵan bir qatar jaslar Joqarǵı Keńes Prezidiumınıń qararı tiykarında «Húrmet jarlıǵı» menen sıylıqlandı.

Qaraqalpaqstan xabar agentligi