Mektepke shekemgi hám mektep bilimlendiriwi ministrligi shet tili pánleri muǵallimleriniń jumıs alıp barıwına baylanıslı xabarlarǵa anıqlıq kirgizdi.
Ministrliktiń málim etiwinshe, endi ulıwma bilim beriw mekteplerinde jumıs islep atırǵan shet tili muǵallimleri ushın keminde V2 dárejedegi milliy yamasa oǵan teńlestirilgen xalıqaralıq til sertifikatına iye bolıw lawazım mamanlıq talaplarınıń tiykarǵı shártlerinen biri sıpatında belgilengen.
Bul talap Ministrler Kabinetiniń 2021-jıl 19-maydaǵı qararında belgilengen bolıp, onıń kúshke kiriw múddeti pedagoglar hám jámiyetshiliktiń múrájatları tiykarında bir neshe márte sozdırılǵan.
Ministrlik tárepinen sertifikat alıw ushın muǵallimlerge biypul onlayn hám oflayn tayarlaw sabaqları shólkemlestirilgeni xabarda esletip ótilgen.
Nátiyjede 2025-jıldıń sentyabr-dekabr aylarında 5 mıńnan aslam pedagog sertifikatqa iye boldı. Házirgi waqıtqa kelip bolsa 39 mıńnan aslam shet tili muǵallimleri tiyisli sertifikatlarǵa iye, delinedi maǵlıwmatta.
Málim etiliwinshe, sertifikatqa iye bolmaǵan muǵallimlerge 2026-2027-oqıw jılı baslanǵanǵa shekem imtixan tapsırıw hám hújjetti qolǵa kirgiziw imkaniyatı beriledi. Sonıń menen birge, tayarlaw kursları aldaǵı waqıtları da dawam ettiriledi.

Qaraqalpaqstan xabar agentligi