Respublikamızdıń barlıq aymaqlarında bolǵanı sıyaqlı, Ózbekstan Respublikası Qurallı Kúshleri dúzilgenliginiń 34 jıllıǵı hám «14-yanvar – Watan qorǵawshıları kúni» múnásibeti menen Taxtakópir rayonında saltanatlı bayram ilajı bolıp ótti.
Oǵan rayon hákimligi, Qorǵanıw bóliminiń xızmetkerleri, huqıq qorǵaw uyımlarınıń wákilleri, veteranlar, deputatlar, aymaq belsendileri, nuraniyler hám jaslar qatnastı.
Saltanatlı máresim Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajdı rayon hákiminiń orınbasarı Sh.Bekturǵanov kiris sóz benen ashıp, barlıq áskeriy taraw xızmetkerlerin, veteranlardı hám xalqımızdı bayram múnásibeti menen qutlıqladı.
Bunnan soń, rayonlıq Qorǵanıw isleri bólimi baslıǵı, podpolkovnik F.Juraev sózge shıǵıp, húrmetli Prezidentimiz, Qurallı Kúshler Joqarı Bas Sárkardasınıń ayırıqsha itibari menen tarawda erisilip atırǵan jetiskenliklerge keń túrde toqtalıp ótti.
Ótkerilgen ilaj dawamında tarawda uzaq jıllar nátiyjeli xızmet etken, Watan qorǵaw jolında pidákerlik penen miynet etken veteranlar, búgingi kúni xızmet etip atırǵan bir qatar taraw pidayıları rayon hákimliginiń Húrmet jarlıǵı hám estelik sawǵaları menen sıylıqlandı.
Bayram ilajı mádeniyat tarawı xızmetkerleriniń Watansúyiwshilik ruwxında tayarlanǵan koncert baǵdarlamaları menen kóterińki keypiyatta dawam etti.

Qaraqalpaqstan xabar agentligi