Ózbekstan Respublikası Prezidenti Shavkat Mirziyoevtiń Oliy Majlis hám xalqımızǵa jollaǵan Múrájatı – mámlekettiń rawajlanıwı, ekonomikanı modernizaciyalaw hám jaslardıń imkaniyatların ele de keńeytiwge qaratılǵan áhmiyetli hújjet bolıp esaplanadı. Múrájat mámleketlik siyasattaǵı tiykarǵı baǵdarlardı anıq belgilep, atap aytqanda, kásiplik tayarlaw, miynet bazarı hám bilimlendiriw tarawında ámelge asırılıp atırǵan reformalarǵa ayrıqsha itibar qaratqanı menen jáne de áhmiyetli. Atap aytqanda, onda jaslardıń bilim hám mamanlıǵın arttırıw, olardı zamanagóy, talap joqarı bolǵan kásipler menen tanıstırıw hám miynet bazarında básekige shıdamlı qánige sıpatında tayarlawda zamanagóy baǵdarlar belgilengen. Múrájatta belgilengen wazıypalar arqalı mámleketimizdiń bilimlendiriw hám kásiplik tayarlaw sistemasın xalıqaralıq standartlarǵa sáykes túrde rawajlandırıw, mektep hám texnikumlar, sonday-aq, jumıs beriwshiler menen tıǵız birge islesiwdi bekkemlew kórsetip ótildi.
Kásiplerdi rawajlandırıw hám jańa miynet bazarı arxitekturasın jaratıw – búgingi kún talabı bolıp esaplanadı. Jańa texnologiyalar, sanlastırıw hám jasalma intellekt tásirinde miynet bazarı keskin ózgermekte, sonıń ushın balalarımızǵa kásiplik baǵdardı belgilew hám olardı mamanlıǵına say bilimlendiriwge baǵdarlaw zárúr. Qánigelerdiń atap ótiwinshe, balada kásipke qızıǵıwshılıq 7-klasstan baslanıp, 9-klassta anıq qáliplesedi. Sonlıqtan, 9-klass pitkeriwshilerin pánlerdi ózlestiriwi hám kásiplik qızıǵıwshılıǵına qaray baǵdarlaw sisteması – jaslarımızdıń qábileti hám qızıǵıwshılıǵına sáykes kásip tańlawı ushın áhmiyetli qádem bolıp esaplanadı. Bul arqalı joqarı oqıw ornına kiriw tileginde bolmaǵan jaslar da nátiyjeli kásiplik bilim aladı.
Texnikumlardıń zamanagóy ortalıqqa iye bolıwı, aldınǵı bilimlendiriw baǵdarlamalarınıń engiziliwi hám hár jılı keminde 100 texnikumdı tolıq ońlap, texnologiyalıq jaqtan zaman talabına say úskenelew – kásiplik bilimlendiriwdiń sapası hám abırayın jańa basqıshqa alıp shıǵadı. Aldınǵı kásiplik sheberlik texnikumları hám “Kásipler qalashası” joybarları mektep, texnikum hám jumıs beriwshi arasındaǵı birge islesiwdi bekkemleydi, jaslardı qurılıs, servis, sanaat, awıl xojalıǵı, transport hám “jasıl” energetika tarawlarındaǵı zamanagóy kásiplerge baǵdarlaw imkaniyatın beredi.
Dual bilimlendiriw sistemasın qollap-quwatlaw, jumıs beriwshilerge jeńilletilgen kreditler hám salıq jeńillikleriniń engiziliwi bilimlendiriw hám óndiris arasındaǵı baylanıstı jáne de bekkemleydi. Sonıń menen birge, 100 mıń texnikum oqıwshısına stipendiya engiziliwi hám “ayrıqsha” bahalarǵa iye, kásibin puqta iyelep atırǵan jaslarǵa jáne de kóbirek muǵdarda stipendiya beriliwi – jaslarımızdıń kásiplik bilimlendiriwge qızıǵıwshılıǵın hám bilimge umtılıwın jáne de arttıradı.
Prezident Múrájatında belgilengen wazıypalar – tek ǵana ekonomikanıń tiykarǵı tarawları ushın joqarı intellektuallıq potencialǵa iye kadrlardı tayarlawǵa emes, al jaslardıń keleshegin bekkemlewge qaratılǵan imkaniyatlar deregi ekenligin atap ótkim keledi. Deputat hám bilimlendiriw tarawınıń wákili sıpatında bul reformalardıń orınlarda nátiyjeli engiziliwine ámeliy úles qosıw, bilimlendiriw mákemeleri, jergilikli strukturalar hám jumıs beriwshiler arasındaǵı óz-ara birge islesiwdi bekkemlew úlken áhmiyetke iye dep bilemen. Belgilengen wazıypalardıń orınlanıwı, jaslardıń kásiplik qızıǵıwshılıǵı hám miynet bazarınıń talaplarına sáykes potencialın rawajlandırıw máseleleri mine usı birge islesiw arqalı anıq nátiyjeler beriwi, jaslarımızdıń kásip iyelewi hám jámiyette óz ornın tabıwına xızmet etedi.

Janar Alieva,
Xalıq deputatları Shımbay rayonlıq Keńesiniń
deputatı, rayondaǵı 17-sanlı mektep direktorı.
Qaraqalpaqstan xabar agentligi