Ájiniyaz atındaǵı Nókis mámleketlik pedagogikalıq institutında Ózbekstan Respublikası Qurallı Kúshleriniń dúzilgenine 34 jıl tolıwı hám 14-yanvar – Watan qorǵawshıları kúnine baǵıshlanǵan ushırasıw hám bayram keshesi bolıp ótti.
Bayram ilajına Qaraqalpaqstan Respublikası Qorǵanıw isleri basqarması veterenlar keńesiniń baslıǵı, rezervdegi mayor Dástan Allamuratov, onıń orınbasarı, rezervtegi serjant Baxıt Qannazarov, awǵan urısı qatnasıwshısı, rezervtegi serjant Murat Abdullaev, Qaraqalpaqstan Respublikası Ishki isler ministrligi Málimleme texnologiyaları tarawındaǵı jınayatlarǵa qarsı gúresiw basqarmasınıń aǵa inspektorı Atabek Xodjaev, fakultet dekanlarınıń orınbasarları, tyutorlar hám student-jaslar qatnastı.
Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov shıǵıp sóylep, qatnasıwshılardı bayram menen qutlıqladı hám mámleketimiz Qurallı Kúshleriniń dúziliwi, sońǵı jıllarda milliy armiyamızdı ele de rawajlandırıw, onıń jawıngerlik tayarlıǵın jetilistiriw, materiallıq-texnikalıq bazasın bekkemlew, xalıqaralıq abıroyın arttırıw baǵdarında ámelge asırılıp atırǵan jumıslar, tarawdaǵı reformalardıń nátiyjeleri haqqında maǵlıwmatlar berdi.
Ótken jıllar dawamında Ózbekstan Respublikasın rawajlandırıw boyınsha Háreketler, sonday-aq, Rawajlanıw strategiyaları hám Qorǵanıw doktorinası tiykarında áhmiyetli jáne tariyxıy qararlar qabıl etildi. Ásirese, elimiz kóleminde áskeriy-hákimshilik sektorlarınıń dúzilgenligi, jergilikli byudjet qarjıları esabınan áskeriy xızmetkerlerdi qollap-quwatlaw, olarǵa múnásip jumıs hám turmıs sharayatların jaratıp beriwde islenip atırǵan jumıslar óz nátiyjelerin bermekte.
Atap aytqanda, milliy armiyamızdıń aymaqlıq, xalıqaralıq reytinglerdegi, ótkerilip atırǵan hár qıylı jarıslardaǵı kórsetkishleri joqarılamaqta. Búgingi kúnde Qurallı Kúshlerimiz dúnya júzinde hám ǴMDA, sonıń menen birge, Oraylıq Aziya mámleketleri arasında joqarı orınlardı iyelemekte.
Milliy, aymaqlıq hám globallıq qáwipsizlikke qarsı hár qıylı qáwipler júz berip atırǵan búgingi kúnde xalqımızdıń tınısh hám paraxat turmısta ómir súriwi, shegaralarımızdıń pútinligin jáne qolqatılmaslıǵın támiyinlew hár birimizdiń aldımızdaǵı baslı wazıypalardan biri bolıp esaplanadı.
Ilajda usınday úlken maqsetlerden kelip shıǵıp, Prezidentimizdiń «Jańa Ózbekstannıń 2022-2026-jıllarǵa belgilengen Rawajlanıw strategiyası haqqında»ǵı pármanında kórsetip ótilgen jeti baslı baǵdardıń biri elimiz qáwipsizligi hám qorǵanıw potencialın kúsheytiw, ashıq-aydın hám pragmatikalıq, jedel sırtqı siyasat alıp barıw ekenligi, sonday-aq, olardan kelip shıǵıp ámelge asırılıp atırǵan jumıslar haqqında maǵlıwmatlar berildi.
Sonıń menen birge, veteran áskeriy xızmetkerler jaslarǵa ózleriniń ómir jolı, awǵan urısınıń aqıbetleri haqqında ayta kelip, búgingidey tınısh hám paraxat turmısımızdıń qádirine jetip, jaratılıp atırǵan imkaniyatlardan nátiyjeli paydalanıwǵa hám elimizdiń rawajlanıwına úleslerin qosıwǵa shaqırdı.
Ilaj instituttıń «Tumaris» xalıq ansambli hám talantlı student-jasları atqarıwındaǵı koncert baǵdarlaması menen dawam etti.

Qaraqalpaqstan xabar agentligi.