Ájiniyaz atındaǵı Nókis mámleketlik pedagogikalıq institutında Ózbekstan Respublikası Qurallı Kúshleri dúzilgeniniń 34 jıllıǵı hám 14-yanvar – Watan qorǵawshıları kúni múnásibeti menen fakultetlerde oqıp atırǵan student-jaslar arasında «Turan batırları» áskeriy-sport jarısı bolıp ótti.
Instituttıń Jaslar awqamı baslanǵısh shólkemi, jaslar menen islesiw hám ruwxıy-aǵartıwshılıq bólimi, institut sport klubı, sonday-aq, Milliy gvardiyanıń Qaraqalpaqstan Respublikası boyınsha basqarması menen birgelikte shólkemlestirilgen jarısqa barlıq fakultetlerden komandalar qatnastı.
Jaslardı watan súyiwshilik ruwxında tárbiyalaw, olardıń ruwxıy hám fizikalıq tayarlıǵın kúsheytiw, jaslar arasında salamat turmıs tárizin úgit-násiyatlaw hám Qurallı Kúshler quramında xızmet etiwge bolǵan qızıǵıwshılıqtı arttırıw maqsetinde ótkerilgen jarısta qatnasıwshılar turnikte tartılıw, «AKM» avtomatın bóleklerge ajıratıw hám jıynaw, mergenlik (oqjaydan atıw), arqan tartısıw shártleri tiykarında ózleriniń fizikalıq tayarlıǵı hám imkaniyatların sınaqtan ótkerdi.
Jarıs juwmaǵında 1-orınǵa Pedagogika-psixologiya hám dóretiwshilik tálim fakulteti, 2-orınǵa Tariyx fakulteti, 3-orınǵa Anıq pánler fakulteti komandaları múnásip dep tabıldı.
Jeńimpazlar hám sıylı orın iyeleri shólkemlestiriwshiler tárepinen diplom hám bayram sawǵaları menen sıylıqlandı.
Ilaj sheńberinde Milliy gvardiya xızmetkerleri menen áskeriy qural-jaraqlar hám xızmet iytleriniń jumısları sáwlelengen kórgizbe shólkemlestirildi.

Qaraqalpaqstan xabar agentligi.