Nókis qalasında jaylasqan áskeriy bólimde Ózbekstan Respublikası Qurallı Kúshleri dúzilgeniniń 34 jıllıǵı múnásibeti menen ashıq esikler kúni ilajı shólkemlestirildi. Ilajda ulıwma orta bilim beriw mektepleriniń oqıwshıları, kolledj hám texnikum studentleri, joqarı oqıw orınlarınıń jasları hám keń jámiyetshilik wákilleri qatnastı.
Ilaj dawamında qatnasıwshılar áskeriy bólimniń zamanagóy sharayatları menen tanıstı, áskeriy xızmetkerlerdiń kúndelikli xızmet jumısın jaqınnan baqlaw imkaniyatına iye boldı. Zamanagóy jataqxanalar, sport zalları, awqatlanıw orınları, oqıw xanaları hám dem alıw aymaqları jaslarǵa búgingi áskeriy xızmettiń qolaylı hám sistemalı tárizde shólkemlestirilgenin maqtanıshlı hám perspektivalı kásip sıpatında kórsetti. Ásirese, Ámir Temur hám Jalaladdin Manguberdi atları menen bezelgen tematikalıq klasslar jaslardıń qálbinde milliy maqtanısh hám tariyxqa bolǵan qızıǵıwshılıqtı jáne de arttırdı.
Qurallı kúshler sistemasında xızmet etip atırǵan áskeriy xızmetkerler tárepinen kórsetilgen qol urısı kórgizbeli shıǵıwları tamashagóylerde úlken qızıǵıwshılıq oyattı. Shaqqanlıq, anıqlıq hám joqarı fizikalıq tayarlıqtı ózinde jámlegen bul kórgizbeli shınıǵıwlar áskeriy xızmetkerlerdiń tek ǵana fizikalıq emes, al ruwxıy jaqtan da kúshli ekenin ayqın kórsetti.
Sonday-aq, ilaj dawamında zamanagóy qural-jaraq hám áskeriy texnikalar kórgizbesi ilaj qatnasıwshılarınıń itibarına usınıldı. Jaslar áskeriy texnikalardıń imkaniyatları, olardıń jawıngerlik tayarlıqtaǵı ornı menen jaqınnan tanısıp, qánigelerden tolıq maǵlıwmatlar aldı.
Ilajdıń eń qızıqlı hám innovaciyalıq bólimi sıpatında dronlar shousı ayrıqsha itibardı tarttı. Ushıwshısız ushıw apparatlarınıń hawada muwapıqlastırılǵan háreketi, olardıń razvedka hám baqlaw imkaniyatları kórsetilip, zamanagóy armiyada sanlı texnologiyalardıń ornı qanshelli áhmiyetli ekeni ámelde kórsetip berildi. Bul shou jaslardıń sanasında keleshektegi áskeriy kásiplerdiń kelbetin jáne de ayqın sáwlelendirdi.
Atap ótiw orınlı, ashıq esikler kúni ilajı jaslar hám xalıq wákilleri ushın milliy armiyamızdıń kúshi, potencialı hám zamanagóy rawajlanıwın jaqınnan kóriw, áskeriy xızmetkerler menen pikirlesiw imkaniyatın jarattı.

Qaraqalpaqstan xabar agentligi.
M.Habiybullaevtıń túsirgen súwretleri.