Nókis qalasında “Zamanagóy xızmet kórsetiw hám miymandoslıq standartları” atamasında seminar-trening bolıp ótti.
Bul ilaj “QR Gastronomic Quality” joybarı sheńberinde DMO Karakalpakstan jámiyetlik birlespesi tárepinen shólkemlestirilip, oǵan respublikamızdaǵı belgili kafe, restoran hám shayxanalardıń iyeleri hám basqarıwshıları, oficiantlar, xosteslar, zal menedjerleri, gastronomiyalıq joybarlardıń wákilleri, sonday-aq, servis tarawına qızıqqan jaslar qatnastı.
DMO Karakalpakstan Ózbekstan Respublikası Oliy Majlisi janındaǵı Puqaralıq jámiyeti institutların qollap-quwatlaw jámiyetlik fondınıń sociallıq buyırtpalar tańlawınıń jeńimpazı bolıp, “QR Gastronomic Quality: Qaraqalpaqstannıń tartımlılıǵın arttırıw ushın gastronomiyalıq turizm xızmetleriniń sapasın bahalaw hám jaqsılaw” joybarın ámelge asırmaqta. Joybar gastronomiyalıq xızmetlerdiń sapasın arttırıw hám regionnıń turistlik potencialın rawajlandırıwǵa qaratılǵan.
Seminarda qánigeler tárepinen restoran xızmetiniń zamanagóy standartları, tutınıwshılardıń tájiriybesin qáliplestiriwde miymandoslıqtıń (hospitality) ornı, sonday-aq, Franciya, Italiya, Yaponiya, Túrkiya hám AQSh restoranlarındaǵı xalıqaralıq xızmet kórsetiw ámeliyatı tuwralı keń túrde maǵlıwmatlar berildi. Onda sırt el standartların Ózbekstandaǵı ulıwma awqatlanıw ámeliyatı menen salıstırıwǵa ayrıqsha itibar qaratıldı.
Seminardıń ayrıqsha bólimleri shaǵımlar hám básekili máseleler menen islesiw, miymanlar menen qarım-qatnas kónlikpelerin rawajlandırıw máseleleri, xızmet kórsetiwdi marketing quralı hám restoranlardıń básekige shıdamlılıǵınıń áhmiyetli faktorı sıpatında kórip shıǵıw, sonıń ishinde, xızmet sapasın onlayn-bahalaw hám mákemeniń abırayına tásiri máselelerine baǵıshlandı.
Seminarda qatnasıwshılar QR Gastronomic Quality sistemasınıń tiykarǵı principlerin ózlestirip, xızmet kórsetiwdiń sapasın arttırıw ushın ámeliy kónlikpeler arttırdı hám xalıqaralıq servis elementlerin jergilikli ózgesheliklerdi esapqa alǵan halda qanday beyimlestiriw múmkin ekenligi haqqında túsiniklerge iye boldı.
Bunday ilajlardıń ótkeriliwi gastronomiyalıq turizmniń turaqlı rawajlanıwına xızmet etedi hám Qaraqalpaqstannıń turistlik baǵdar sıpatındaǵı tartımlılıǵın arttıradı.

Á.Jiyemuratov,
Qaraqalpaqstan xabar agentligi.