Nókis Qorǵanıw isleri basqarması tárepinen ǵalaba xabar quralları xızmetkerleri ushın arnawlı press-tur shólkemlestirildi.
Press-tur dawamında jurnalistler aldınǵı málimleme-kommunikaciya texnologiyaları hám zamanagóy sanlı basqarıw sistemalarınıń jumısı menen tanıstı. Ekskursiya dawamında qatnasıwshılar hár bir sistemanıń islew principleri, maqsetli wazıypalardı ámelge asırıwdaǵı imkaniyatları hám áskeriy tayarlıq procesindegi áhmiyeti haqqında dáslepki maǵlıwmatlarǵa iye boldı.
Ilajdıń oraylıq mánzili – shaqırılıwshılardı áskeriy-texnikalıq qánigelikler boyınsha tayarlaw orayı boldı. Bul oray jaslardı ápiwayı áskerden zamanagóy texnologiyalardı basqaratuǵın, anıq maqset belgiley alatuǵın hám juwapkershilikti tereń sezetuǵın zamanagóy áskeriy qánige sıpatında qáliplestiredi. Ásirese, dron ushıwshıları baǵdarı búgingi áskeriy tarawdıń eń áhmiyetli hám perspektivalı baǵdarlarınan biri sıpatında ayrıqsha itibarǵa ılayıq.
Ilaj dawamında juwapkerler atap ótkenindey, jaslardı Watansúyiwshilik ruwxında tárbiyalaw – bul tek ǵana súren emes, al real bilim, anıq kásip hám bekkem turmıslıq poziciya beriw degen sóz. Búgin drondı basqarıwdı úyrenip atırǵan jaslar erteń tek ǵana áskeriy tarawda emes, al tınısh turmısta da joqarı texnologiyalar menen isley alatuǵın maman qánige sıpatında jetilisedi.
Qısqasha aytqanda, press-tur Qurallı Kúshlerdiń zamanagóy rawajlanıw baǵdarları, sanlı texnologiyalardı engiziwdegi jetiskenlikleri hám jaslardı tayarlawda jaratqan imkaniyatların keń jámieytshilikke ashıq túrde kórsetti.
Ilaj juwmaǵında ǵalaba xabar qurallarınıń xızmetkerlerine shólkemlestiriwshiler tárepinen minnetdarshılıq xatı hám estelik sawǵaları tapsırıldı.

Qaraqalpaqstan xabar agentligi.
M.Habibullaevtıń túsirgen súwretleri