1979-jılı taxttan qulatılǵan Iran shahınıń balası Reza Pehlavi dawam etip atırǵan ǵalabalıq kóterilisler waqtında Iranǵa qaytıwǵa tayar ekenin bildirdi. Ol bunı “sheshiwshi sát” dep atap, AQSh basshılıǵın belsendi háreket etiwge shaqırdı.
Onıń aytıwınsha, ótiw dáwiri ushın arnawlı topar qáliplestiriw ústinde álleqashan jumıs baslaǵan. Bul haqqında DW xabar berdi.
Reza Pehlavi Fox News telekanalı arqalı AQSh prezidentine múrájat etip, onı tınıshlıq hám “jawız kúshler”ge qarsı gúres rámzi sıpatında táriyipledi.
Reza Pehlavidiń atap ótiwinshe, Tramptıń ashıq qollap-quwatlawı Irandaǵı narazı kúshlerge kúshli ruwxıy tayanısh bermekte. Ol házirgi jaǵdaydı milletti azat etiw ushın sheshiwshi sát dep bahalaǵan. Sonday-aq, imkaniyat tuwılıwı menen Iranǵa qaytıwǵa tayar ekenin málim etken.
The Wall Street Journal basılımınıń xabar beriwinshe, búgin yaǵnıy 13-yanvar kúni Donald Tramptıń janında Irandaǵı jaǵday dodalanadı. Onda áskeriy soqqılar, kiberhújimler, jańa sankciyalar hám oppoziciyanı qollap-quwatlaw máseleleri kórip shıǵılıwı múmkin.
Reuters agentliginiń xabar beriwinshe, ushırasıwǵa Tramptıń joqarı lawazımlı keńesgóyleri qatnasadı. 64 jastaǵı Reza Pehlavi ákesi Muhammad Reza Pehlavi 1979-jılı taxttan qulatılǵanınan berli AQShta jasap kelmekte. Ol Tegerandaǵı hákimiyattı ózgertiw tárepdarı sıpatında shıǵıp atır.

Kenja Bekjonov, Salim Obidjonov (video), ÓzA