Keyingi jılları Ózbekstannıń taw-kán sanaatı hám geologiya tarawında sırt el investorları menen birge islesiwdi keńeytiw hám jańa investiciyalıq joybarlardı ámelge asırıw baǵdarında bir qatar áhmiyetli qádemler taslanbaqta.
Ásirese, bul baǵdardaǵı ushırasıwlar tek ǵana zamanagóy texnologiyalardı engiziw imkaniyatların dodalaw emes, al tábiyǵıy resurslardan nátiyjeli hám ekologiyalıq turaqlı paydalanıwdı támiyinlew, óndiris kólemlerin arttırıw jáne tarawda básekige shıdamlı ortalıqtı jaratıwda ayrıqsha áhmiyetke iye bolmaqta.
Ózbekstan Respublikası Taw-kán sanaatı hám geologiya ministrliginde Qıtaydıń “China Coal Resource Development” iri energetika hám kómir islep shıǵarıw kompaniyasınıń bas direktorı Yu.CHin Sian basshılıǵındaǵı delegaciya menen ótkerilgen ushırasıwda da áyne usı tarawda birge islesiwdi bekkemlew máselelerine áhmiyet qaratıldı.
Ushırasıwda tárepler mámleketimizdegi perspektivalı joybarlardı ámelge asırıw, sonıń ishinde, kómir sanaatında birge islesiw imkaniyatları, zamanagóy texnologiyalar tiykarında qazıp alıwda qorshaǵan ortalıqqa tásirdi azaytıw ilajları hám óndiris kólemlerin arttırıw áhmiyetli wazıypalardan ekenin atap ótti. Sol sebepli, bul processte olar óz-ara imkaniyatlardı kórip shıǵıwǵa itibar qarattı.
Onda delegaciya aǵzaları birge islesiwdiń nátiyjeliligin támiyinlew, perspektivalı joybarlar sheńberinde óz-ara paydalı baylanıslardı bekkemlew hám tarawda innovaciyalıq kózqaraslardı engiziwdiń áhmiyetin ayrıqsha atap ótti. Olardıń sózlerine bola, “China Coal Resource Development” Qıtayda kómir qazıp alıw, qayta islew hám zamanagóy texnologiyalar tiykarında ekologiyalıq turaqlı rawajlandırıwǵa qaratılǵan joybarlardı ámelge asırıw tarawında úlken tájiriybege iye bolıp, xalıqaralıq kólemde de keńnen tanılǵan kompaniya bolıp esaplanadı.
Ushırasıw juwmaǵında tárepler óz-ara birge islesiwdi bekkemlew boyınsha aldaǵı wazıypalardı belgilep aldı.

N.Ziyodullaeva, ÓzA