Balalıq, jaslıq, ǵarrılıq… Insan ushın inam etilgen usı ómir máwritlerin hámme de tolıq hám kewlindegidey etip jasap óte bermeydi. Biraq, sınaq hám mashaqatlardı jeńip, jámiyetten óz ornın tawıp, óziniń minez qulqı hám pazıyletleri menen kerekli insanǵa aylanǵan jaqsı insanlar «ekinshi ómiri» arqalı da keleshek áwladtıń yadında uzaq dáwirler jasap qaladı. Xalqımızda «Jaqsıdan baǵ qaladı» degen gáp bar. Mehriban ana, tájiriybeli ustaz Bibisara Nuratdinova da el-xalqımızǵa bilimli hám tárbiyalı perzentleri menen bir neshe shákirtlerdi ózinen miyras etip qaldırıp ketti.
Ámiwdárya rayonında tuwılıp ósken ol, Nókis qalasına bilim alıw ushın kelgeninde on jeti jastaǵı qız edi. Balalıǵınan pedagog bolıwdı arman etken ol, Qaraqalpaq mámleketlik pedagogikalıq institutınında bilim alıp, 1973-jılı tabıslı tamamlaydı. Aydın keleshekke qádem taslar eken, oqıwdı pitkergen jılınan baslap Nókis medicina uchiliщesinde (házirgi Nókis medicina texnikumı) kadrlar bólimi baslıǵı lawazımında miynet jolın baslaydı. 1985-jıldan baslap 2005-jılǵa shekem sol oqıw ornında rus tili hám ádebiyatı páni muǵállimi bolıp minsiz xızmet atqaradı. Óziniń tájiriybesi hám jámáát arasındaǵı abırayı menen kafedra baslıq lawazımında jumıs alıp baradı.
Medicina bilim jurtında student jaslar ushın rus tili hám ádebiyatı pánin biliw júdá zárúr bolǵanlıqtan olarǵa bilim beriw ushın pedagogtan sheberlik, talapshanlıq, bilim talap etiler edi. Bibisara apa bul juwapkershilikti tereń sezingen halda jaslarǵa úlken sheberlik hám zaman talapları tiykarında bilim beriwden jalıqpadı. Ustaz sabaq waqtında til mádeniyatı, kórkem bayanlaw hám ádebiy dúnya qarasın qáliplestiriwge ayrıqsha itibar qaratar edi. Studentlerdi tek ǵana sabaqtı ózlestiriw emes al, erkin pikirlewge, sóz qudiretin tereń seziniwge, hár qanday tildi taza sóylewge úyreter edi.
Bibisara apa izleniwsheń hám talapshan ustaz boldı. Ol oqıw ornındaǵı oqıw metodikalıq jumıslardı jaqsılaw maqsetinde bir qansha oqıw qollanbalar isledi. Rus tili hám ádebiyatı páni oqıw baǵdarlaması, lekciyalar tekstlerin jazıp shıǵıp hám óz is tájiriybesin en jaydırıw maqsetinde respublikalıq gazetalarǵa maqalaları menen qatnasıp turdı. Ustaz student jaslardıń rus tiline bolǵan qızıǵıwshılıǵın arttırıw ushın jańa metodlardan paydalanıp, sabaqların qızıqlı hám túsinikli etip ótiwge háreket etip bardı. Sonday-aq, oqıw ornındaǵı ruwxıy hám aǵartıwshılıq jumıslarǵa da belsendilik penen qatnasıp, studentler arasında kitap hám gazeta-jurnallardı oqıp barıwǵa shaqırıp barar edi. Ol tájiriybeli ustaz sıpatında jas oqıtıwshılarǵa da ustazlıq etiw menen birge olarǵa óz ómir tájiriybesinen tálim-tárbiya beriwden jalıqpadı.
«Daraq bir jerde kógeredi» degenindey, óziniń 31 jıllıq miynet jolında Nókis medicina bilim jurtında jaslarǵa bilim berip, bir neshe mıńlaǵan shákirtlerge ustazlıq etken Bibisara Nuratdinovanıń miynetleri Húkimetimiz tárepinen múnásip bahalanıp, 2007-jılı «Qaraqalpaqstan Respublikasına miyneti singen muǵállim» húrmetli ataǵı menen sıylıqlanadı. Sonday-aq, 2000-jılı Qaraqalpaqstan Respublikası orta arnawlı kásip-óner bilimlendiriw basqarması tárepinen Húrmet jarlıǵı, 1995-jılı Ózbekstan Respublikası Densawlıqtı saqlaw ministrliginiń Húrmet jarlıǵı menen sıylıqlandı.
Hayaldıń baxtı álbette shańaraǵı menen. Ol tábiyattı qorǵaw komitetinde juwapkerli lawazımlarda xızmet atqarǵan ómirlik joldası Húrmetulla Uteshov penen birge bes perzentti tárbiyalap, olardı bilimli-ilimli etip kamalǵa keltirdi. Úlken ulı Izzetulla Uteshov Ishki isler ministrliginde juwapkerli lawazımlarda xızmet etken bolsa, Ulpetulla Respublikalıq emlewxanada shıpaker (2020-jılı qaytıs boldı) bolıp, xalqımızdıń densawlıǵın saqlawda úlken úles qostı. Al, Sanetullası bolsa zamanǵa ayaq qosqan jeke isbilermen, Saragúl qızı mektep direktorı bolıp islep atırgan bolsa, Zernegúl QMUda oqıtıwshı bolıp islep, student jaslarǵa bilim berip kelmekte. Olar perzentlerinen 15 aqlıq, 5 shawlıq súygen baxıtlı ata-ana boldı.
-Kempir apam bizlerdiń de tárbiyamız benen shuǵıllanatuǵın edi, – deydi onıń birinshi aqlıǵı Sarbinaz Xurmetullaeva.
–Bilim alıwımızǵa ayrıqsha itibar menen qaradı. Bos waqıtlarımızdı mazmunlı ótkeriwimiz ushın hár qıylı pán dógreklerine ózi alıp baratuǵın edi. Kitap oqıwǵa qızıqtırıp, ózi qadaǵalap baratuǵın edi. Onıń jaqsı pazıyletleri júrek tórimizde mángige saqlanıp qalǵan.
Adamgershilikti, tuwrı sózlikti, insanıylıqtı barlıq nárseden ústin qoyǵan Bibisara apa, usı pazıyletleri menen jaqınlarınıń qálbinde jaqsı eslewler qaldırıp 2019-jılı bul dúnyadan kóz jumdı. Eger aramızda bolǵanda 74 jastı qarsı alatuǵın edi dep eslewimige múnásip bolǵan ustazdıń ekinshi ómiri perzentleriniń hám shákirtleriniń el-xalqımızǵa xızmetleri menen dawam etip atır. Insannıń bul dúnyada jasawınıń mánisi de sol.

G.Turdıshova, Qaraqalpaqstan xabar agentligi