Qaraqalpaqstan Respublikası Ministrler Keńesinde xalıqtı hám awıl xojalıǵın dizimge alıw ilajların joqarı dárejede shólkemlestiriw máselelerine baǵıshlanǵan májilis bolıp ótti.

Oǵan Ministrler Keńesi Baslıǵınıń birinshi orınbasarı N.Erlepesov, respublikamız aymaǵında jumıs alıp barıp atırǵan kárxana, ministrlik hám shólkemlerdiń basshıları, juwapker xızmetkerleri qatnastı. Sonday-aq, qala hám rayon hákimlikleri, uyım hám shólkemlerdiń basshıları májiliste Zoom platforması arqalı onlayn qatnastı.

Onda mámleketimiz boyınsha xalıqtı hám awıl xojalıǵın dizimge alıw ilajların ótkeriwge sanawlı kúnler qalǵanlıǵı ayrıqsha atap ótilip, bul processti belgilengen múddetlerde, sapalı hám shólkemlestiriwshilik penen ámelge asırıw máseleleri hár tárepleme dodalandı.

Sonday-aq, májiliste hár bir ministrlik, uyım hám shólkem basshılarına dizimge alıw ilajlarına puqta tayarlıq kóriw, juwapker xızmetkerlerdi belgilew, zárúr sharayatlardı jaratıw hám belgilengen wazıypalardıń tolıq orınlanıwın támiyinlew boyınsha qatań tapsırmalar berildi. Xalıqtıń bul processke jedel tartılıwın támiyinlew, túsindiriw hám úgit-násiyatlaw jumısların kúsheytiw zárúrligi ayrıqsha atap ótildi.

Májilis sońında dizimge alıw ilajların joqarı dárejede ótkeriw barlıq basshılardıń jeke juwapkershiligi ekenligi atap ótilip, berilgen tapsırmalardıń orınlanıwın qatań qadaǵalawǵa alıw boyınsha tiyisli kórsetpeler berildi.

Qaraqalpaqstan xabar agentligi