Licenziya yamasa ruqsat beriw qásiyetine iye hújjetti alıw tártibi ápiwayılastırılmaqta. “Bizneske licenziyasız kiriw” arnawlı rejimi engizilmekte. Bul institut arqalı ayırım jumıs túrleri menen 3 ayǵa shekem licenziyasız yamasa ruqsatnamasız shuǵıllanıw imkaniyatı jaratıladı. Nátiyjede isbilermenlik subektleri licenziya yamasa ruqsatnama almastan elektron tárizde xabardar etiw arqalı óz jumısın baslaw imkaniyatına iye boladı. Bul isbilermenlikke kiriw hám jańa biznes baslamalardı qollap-quwatlawǵa xızmet etedi.
Bul tártipler sáwlelengen nızam joybarı parlamenttiń tómengi palatasınıń májilisinde kórip shıǵıldı. Atap ótilgenindey, joybar menen mámleketlik xızmetlerdi kórsetiw sistemasın bunnan bılay da keńeytiw, mámleketlik uyımlar hám shólkemlerde mápler soqlıǵısıwınıń aldın alıw, burın nızamlı imkaniyatı bolmaǵan áke atın balaǵa familiya sıpatında beriw ámeliyatı engizilmekte.
Sonday-aq, “Ózarxiv” agentligi sistemasın optimallastırıw, arxivtiń birden-bir avtomatlastırılǵan málimleme sistemasınıń huqıqıy tiykarların belgilew názerde tutılmaqta.
Nızam joybarında názerde tutılıp atırǵan normalar xalıq hám isbilermenlik subektleri ushın biznesti baslawda artıqsha tártip-qaǵıydalardan ótiw processlerin saplastırıw, arxiv shólkemleriniń huqıqıy statusı hám jumısın tártipke salıw, arxiv hújjetlerin elektron túrde saqlaw tiykarların jetilistiriwge xızmet etedi.
Dodalawlarda deputatlar ayırım normalar boyınsha sorawlardı ortaǵa taslap, nızam intakerlerinen túsinik soradı. Dodalawlardan soń nızam joybarı qabıl etildi.

Muhtarama Komilova,
ÓzA