Usı kúnlerde 150 ge shamalas Irak isbilermenlerinen ibarat delegaciya elimizde bolıp tur.
Ózbekstan Sawda-sanaat palatası málimleme xızmetiniń maǵlıwmatına bola, delegaciya quramınan Irak sawda ministri Asir Dovud Salmon al-Ǵurayriy, ekonomikalıq keńesiniń baslıǵı Ibrohim al-Baǵdodiy, investiciyalar milliy komiteti baslıǵınıń orınbasarı Salar Muhammad Amin orın alǵan.
Irak Respublikasınan kelgen isbilermenler delegaciyası tanısıw baǵdarlamasın alyuminiy hám ayna ramlar, sonday-aq, fasad sheshimlerin islep shıǵaratuǵın “IMZO” zavodına barıw menen basladı.
Bul kárxana taraw boyınsha eń iri kárxanalardan biri esaplanatuǵının atap ótiw kerek: bul jerde derlik 2 mıńnan aslam xızmetker miynet etedi, óndiris kompleksiniń ulıwma maydanı bolsa 16 gektar. Bunday infrastruktura mámleketimizde tarawlıq kórgizbeler, prezentaciyalar hám iri isbilermenlik ilajların ótkeriw ushın keń imkaniyatlar jaratıp atırǵanı menen áhmiyetli bolıp esaplanadı.
Sonday-aq, isbilermenlik saparı sheńberinde Iraklı isbilermenler konditer ónimlerin islep shıǵarıwshı “Krember” brendi astında jumıs alıp barıp atırǵan “Almerro Group” kárxanasına bardı. Bul obekt sapar etiw baǵdarlamasındaǵı ekinshi mánzil bolıp, azıq-awqat sanaatınıń real potencialın kórsetti.
Kárxananıń óndiris kompleksi 8,5 gektar maydandı iyelep, úsh korpustan ibarat. Komplekste mıńǵa shamalas jumısshı miynet etedi. Eksport kólemi jılına 20 million AQSh dollarına teń bolıp, ónimler 15 mámleketke jetkerip berilmekte.
Sapar dawamında miymanlarǵa azıq-awqat sanaatı potencialın sáwlelendiriwshi ulıwmalastırılǵan kórgizbe kórsetildi. Onda 30 islep shıǵarıwshı kompaniya qatnasıp, olar tárepinen jaratılǵan jumıs orınlarınıń sanı 21 500 di quraydı. Kórgizbede qatnasqan bul kompaniyalardıń ulıwma eksport kólemi 122 million AQSh dollarına teń ekeni atap ótildi.
Iraklı isbilermenler úlkemizdegi kárxanalardıń óndiris dárejesi hám eksport imkaniyatların joqarı bahalap, keleshekte birge islesiwdi keńeytiw hám Irak bazarına ónim jetkerip beriwdi arttırıwǵa qızıǵıwshılıq bildirdi.

Ó.Alimov, ÓzA