Nızamsız qurılıslardıń aldın alıw, tarawdaǵı huqıqbuzarlıqlardı azaytıw baǵdarındaǵı ilajlarǵa qaramastan, wákillikli uyımlardıń ruqsatısız, ózbasımshalıq penen turaq jay imaratların qurıw jaǵdayları dawam etpekte. Ayırım obektlerde seysmikalıq qáwipsizlik talaplarına tolıq ámel etilmey atır.
Sonlıqtan, imarat hám obektlerdiń jer silkiniwge shıdamlılıǵı jáne seysmikalıq qáwipsizligin támiyinlew tarawında mámleketlik qadaǵalawdı hám basqarıwdı bunnan bılay da jetilistiriwge qaratılǵan nızam joybarı menen kóp kvartiralı turaq jaylardı ruqsatsız qurǵanı ushın juwapkershilik ilajların kúsheytiw názerde tutılmaqta.
Bul nızam joybarı Nızamshılıq palatasınıń májilisinde birinshi oqıwda kórip shıǵıldı.
Bas prokuror orınbasarı Dilmurod Qosimovtıń atap ótiwinshe, kóp kvartiralı turaq jaylardı ruqsatsız qurǵanı ushın puqaralarǵa bazalıq esaplaw muǵdarınıń 400 esesi, lawazımlı shaxslarǵa bolsa 450 esesi muǵdarında járiyma belgilenbekte. Bunday huqıqbuzarlıq qaytadan islengende, 3 jıldan 5 jılǵa shekem erkinen ayırıw boyınsha jınayıy juwapkershilik belgilew usınıs etilmekte.
Qala qurılısı kodeksinde bolsa “master reje” túsinigi qala qurılısı hújjetleriniń ayrıqsha túri sıpatında bekkemlenbekte. Bul hújjet aymaqlardıń anıq mashqalaların saplastırıw, qala qurılısı, sociallıq-ekonomikalıq hám ekologiyalıq sheshimlerdi úylestiriw, sonday-aq, aymaqlardı qısqa, orta hám uzaq múddetli rawajlandırıwdı rejelestiriwge xızmet etedi.
Bunnan tısqarı, nızam joybarında kópirler hám tunneller, sonday-aq, potencial qáwipi joqarı bolǵan obektlerdi joybarlastırıw hám qurıw ushın berilgen licenziyalardıń ámel etiw múddetin sheklenbegen halda belgilew ámeliyatı biykar etilmekte.
Qurılıs-montajlaw jumısların baslawda xabardar etiw tártibinen ruqsatnama beriw sistemasına ótiw názerde tutılmaqta.
Bul tártipler qala qurılısı jumısı tarawında nızamsız qurılıslardıń aldın alıw, xalıqtıń huqıqları menen máplerin isenimli qorǵaw, qáwipsiz hám sapalı turaq jaylardıń qurılısın támiyinlew, sonday-aq, seysmikalıq qáwipsizlik tarawına zamanagóy hám nátiyjeli qatnaslardı engiziwge xızmet etedi.
Qızǵın dodalawlarda deputatlar tárepinen bir qatar sorawlar ortaǵa taslandı hám tiyisli juwaplar alınıp, nızam joybarı qabıl etildi.

Muhtarama Komilova,
ÓzA