Ózbekstan Respublikası Prezidentiniń 2025-jıl 26-sentyabrdegi arnawlı pármanına muwapıq, ekonomika tarmaqlarında, sonıń ishinde, awıl xojalıǵı tarawında aerokosmoslıq maǵlıwmatlardan paydalanıwdı keńeytiw, basqarıw sistemasın jetilistiriw hám kadrlar potencialın arttırıw boyınsha belgilengen wazıypalar basqıshpa-basqısh ámelge asırılmaqta.
Usı pármannıń orınlanıwın támiyinlew maqsetinde Ózbekstan Respublikası Awıl xojalıǵı ministriniń 2025-jıl 28-noyabrdegi hám Qaraqalpaqstan Respublikası Awıl xojalıǵı ministriniń 2025-jıl 3-dekabrdegi arnawlı buyrıqlarına tiykarlanıp rayonlıq awıl xojalıǵı bólimleri xızmetkerlerin attestaciyadan ótkeriw processleri baslandı.
Attestaciya processleri tastıyıqlanǵan rejege tiykarlanıp ótkerilip, onda xızmetkerlerdiń kásiplik bilimleri menen kónlikpeleri, lawazım minnetlemelerin orınlaw potencialı, zamanagóy basqarıw, sanlı hám aerokosmoslıq texnologiyalar boyınsha bilimleri hár tárepleme bahalanadı.
Sonday-aq, attestaciya processlerinde qollanılatuǵın úlgi sorawnamalar Ózbekstan Respublikası Awıl xojalıǵı ministrligi tárepinen islep shıǵılıp, belgilengen tártipte tastıyıqlanǵan hám ministrliktiń rásmiy veb-saytında járiyalanǵan.
Bul attestaciya jumısları awıl xojalıǵı sistemasında professional kadrlar rezervin qáliplestiriw, basqarıw nátiyjeliligin arttırıw, orınlarda ámelge asırılıp atırǵan reformalardıń sapalı orınlanıwın támiyinlewge xızmet etedi.
Qaraqalpaqstan Respublikası Awıl xojalıǵı ministrligi tárepinen attestaciya processleri belgilengen múddetlerde, ashıq-aydın túrde ámelge asırılıwı támiyinlenedi.

Qaraqalpaqstan xabar agentligi