Joqarǵı sud rásmiy veb-saytında sud tárepinen ekstremistlik yamasa terrorshılıq dep tabılǵan hám Ózbekstan Respublikası aymaǵında jumısı qadaǵan etilgen shólkemler, veb-saytlar, sociallıq tarmaqlar hám mobil messendjerlerdiń dizimi járiyalanıp kelinbekte.
Joqarǵı sud málimleme xızmetiniń málim etiwinshe, mámleketimiz aymaǵına alıp kiriw, tayarlaw, tarqatıw hám kórsetiw qadaǵan etilgen derekler hám kontentler (materiallar) dizimi Joqarǵı sudtıń rásmiy veb-saytındaǵı “Ashıq maǵlıwmatlar” rubrikasında turaqlı túrde jańalanıp járiyalanıp barılmaqta.
Ekstremizm hám terrorizm sıyaqlı buzǵınshı ideyalar menen suwǵarılǵan bunday derekler turmıslıq tájiriybesi hám diniy bilimleri jeterli bolmaǵan ayırım jaslarǵa tásir etip, olardıń sanasında jawızlıq, buzǵınshılıq sıyaqlı illetlerdi qáliplestiriwi múmkin.
Bunday buzǵınshılıq hám wayran etiwdi úgit-násiyatlaytuǵın derek hám materiallardı sud tártibinde qadaǵan etiw ámeliyatı sırt mámleketlerde de keńnen qollanılatuǵının atap ótiw kerek.
Joqarǵı sud tárepinen 2026-jıl 10-yanvar jaǵdayına bola ekstremizm hám terrorizm ideyaların úgit-násiyatlawshı, dep tabılǵan qadaǵan etilgen derek hám kontentler dizimi jańalandı.
Bul materiallar ekstremistlik ideyalardı tarqatıw, zorlıq-zombılıq hám terrorizmdi aqlaw, konstituciyalıq dúzimge hújim etiw belgileri bar dep bahalanǵan.
Nızamshılıqqa muwapıq, usı dereklerdi tarqatıw, saqlaw yamasa úgit-násiyatlaw hákimshilik yamasa jınayıy juwapkershilikke sebep bolıwı múmkin.
Joqarǵı sud puqaralar, ata-analar hám jaslardı diniy dogmatizm, ekstremizm hám terrorizm tuzaǵına túsip qalıwdan bárqulla saqlanıwǵa shaqırdı.

N.Abduraimova, ÓzA