Mámleketimiz basshısı tárepinen 2025-jıldıń 6-dekabr kúni mámleketlik xızmette basqarıw nátiyjeliligin bunnan bılay da arttırıwǵa qaratılǵan áhmiyetli pármanǵa qol qoyıldı. Bul hújjet mámleketlik xızmet sistemasın zamanagóy talaplar tiykarında túp-tiykarınan jańalaw, basqarıwda ashıq-aydınlıq hám juwapkershilikti kúsheytiw jáne nátiyjelilikke baǵdarlanǵan sistemanı qáliplestiriwge xızmet etetuǵını menen ayrıqsha áhmiyetke iye.
Pármanda mámleketlik basqarıwda qarar qabıl etiw hám ámelge asırıw nátiyjeliligin arttırıw, insan resursların basqarıwdı jańa basqıshqa alıp shıǵıw, kadrlar potencialın sistemalı túrde rawajlandırıw tiykarǵı wazıypalar sıpatında belgilep berilgen. Hújjet arqalı artıqsha byurokratiyalıq tosqınlıqlardı qısqartıw, hár bir xızmetkerdiń juwapkershiligin hám jumıs nátiyjeliligin arttırıw, mámleketlik xızmettiń tartımlılıǵın bekkemlew názerde tutılmaqta. Bir sóz benen aytqanda, bul párman “Xalıq mápi – tiykarǵı wazıypa” principin ámelde támiyinlewge qaratılǵan áhmiyetli qádem esaplanadı.
Párman menen mámleketlik basqarıwda “wazıypa – funkciya – resurs – juwapkershilik” shınjırı tiykarında nátiyjelilikti arttırıwǵa qaratılǵan anıq ilajlardı óz ishine alǵan “jol kartası” tastıyıqlandı. Sonday-aq, Basqarıw nátiyjeliligi agentligi jumısı ushın úsh tiykarǵı baǵdar belgilep berildi. Olar – mámleketlik uyımlarda nátiyjege tiykarlanǵan basqarıw sistemasın engiziw, aymaqlarda jańa imkaniyatlardı anıqlaw arqalı basqarıw nátiyjeliligin arttırıw jáne mámleketlik uyımlarda insan resursların basqarıw hám rawajlandırıwdan ibarat.
Pármanda mámleketlik uyımlar hám shólkemlerde insan resursların basqarıw tarawında bir qatar áhmietli jańalıqlar názerde tutılǵan. Atap aytqanda, bos bolǵan mámleketlik puqaralıq xızmeti lawazımların ielew, yaǵnıy tańlaw processleri jańasha sistema tiykarında shólkemlestiriledi. 2026-jıl 1-marttan baslap mámleketlik puqaralıq xızmetindegi bar bos jumıs orınları haqqındaǵı maǵlıwmatlar “vacancy.gov.uz” elektron platformasında járiyalanadı.
Puqaralar bul platformada “jumıs izlewshi” statusında dizimnen ótip, óz qánigeligi, lawazımı hám miynet haqı talaplarına sáykes keletuǵın bos jumıs orınları menen tanısıw imkaniyatına iye boladı. Mámleketlik uyımlar bolsa bos lawazımlarǵa talabanlardı “vacancy.gov.uz” platformasında dizimnen ótken puqaralar arasınan tańlaw tiykarında tańlap aladı. Tańlaw basqıshları Agentlik penen kelisilgen halda jumıs beriwshi tárepinen belgilenedi.
Áhmiyetli táreplerden biri – tańlaw processlerinde talabanlardıń mamanlıq talapların kórip shıǵıw basqıshın avtomatlastırıw, atap aytqanda, jasalma intellekt texnologiyaların engiziw arqalı insan faktorın minimallastırıw bolıp esaplanadı. Bul bolsa qalıslıq hám ashıq-aydınlıqtı támiyinlewge xızmet etedi.
Pármanǵa muwapıq, test nátiyjeleriniń ámel etiw múddeti 6 aydan 1 jılǵa sozıldı. Bul jańalıq talabanlar ushın tańlawlarda qatnasıw imkaniyatların keńeytedi, artıqsha áweregershilikti azaytadı jáne puqaralardıń talap hám tileklerin esapqa alǵan halda processlerdi jáne de qolaylı hám nátiyjeli etiwge qaratılǵan.
Kadrlar rezervin júrgiziw sisteması da jańa, zamanagóy tártip tiykarında qayta shólkemlestiriledi. Bul baǵdarda Agentlik hám mámleketlik uyımlardıń kadrlar rezervin qáliplestiriw hám júrgiziwge baylanıslı funkciya hám wazıypaları anıq belgilep berilmekte. Jańa tártipke bola, mámleketlik uyımlar hám shólkemler tárepinen Milliy kadrlar rezervine kirgizilgen lawazımlar ushın talabanlardıń dizimi erkin túrde qáliplestiriledi.
Tańlawdan ótken talabanlar tárepinen jeke rawajlanıw rejeleriniń orınlanıwı “zaxira.bsa.uz” elektron platforması arqalı turaqlı monitoring etip barıladı. Potencial kadrlar rezervine talabanlar máhállede jumıs alıp barıp atırǵan máhálle baslıǵı, hákim járdemshisi, hayal-qızlar belsendisi, jaslar jetekshisi, sociallıq xızmetker hám salıq inspektorları arasınan rayon (qala) hákimleriniń juwmaǵı tiykarında jumısshı topar tárepinen tańlap alınadı.
Sonıń menen birge, Basqarıw nátiyjeliligi agentligi tárepinen mámleketlik puqaralıq xızmetiniń basqarıw hám siyasiy lawazım toparları ushın kadrlar rezervi erkin túrde qáliplestiriledi. Mámleketlik uyımlarda nátiyjeli xızmet etip atırǵan, biraq basshıları tárepinen usınıs etilmegen talabanlardı erkin anıqlaw hám bahalaw arqalı olardı Milliy kadrlar rezervine kirgiziw mexanizmi de engiziledi.
Ulıwma alǵanda, bul Párman mámleketlik xızmet sistemasında insan kapitalına bolǵan qatnastı túp-tiykarınan jańalap, basqarıw nátiyjeliligin arttırıw, kadrlardı ádil tańlaw hám rawajlandırıw arqalı mámleketlik basqarıwdı sapa jaǵınan jańa basqıshqa alıp shıǵıwǵa qaratılǵan áhmiyetli huqıqıy tiykar bolıp xızmet etedi.

Ilhom Qurbonov,
Ózbekstan Respublikası Prezidenti janındaǵı Basqarıw nátiyjeliligi agentligi
Ekonomika hám infrastruktura tarawlarında mámleketlik xızmet hám basqarıw nátiyjeliligin rawajlandırıw departamenti baslıǵı,
Ekonomika ilimleri boyınsha filosofiya doktorı (PhD)