Ózbekstan Kórkem óner akademiyası Ikuo Xirayama xalıqaralıq mádeniyat kárwan sarayında “Ózbekstan grafikası: keshe hám búgin” atamasındaǵı kórgizbeniń ashılıw máresimi bolıp ótti.
Kórgizbede elimiz grafikasınıń rawajlanıwına úlken úles qosqan ustalar M.Kagarov, Q.Basharov, M.Sodiqov, I.Vaxitov, A.Li, G.Li, L.Davac, Ǵ.Boymatov hám házirgi kúnde Moskvada jasap dóretiwshilik etip atırǵan N.Paklardıń 50 den aslam saylandı shıǵarmaları kórsetildi.
Ilajda atap ótilgenindey, sońǵı jıllar dawamında milliy grafika tarawında da júz berip atırǵan sezilerli ilgerilewler hám jańalanıw procesin baqlaw quwanıshlı.
Atap aytqanda, Ózbekstan Kórkem óner akademiyası tárepinen ótkerilip atırǵan grafika kórgizbeleri usı kórkem óner túrine bolǵan qızıǵıwshılıqtıń artıwı, onda dóretiwshilik etip atırǵan xudojniklerdiń sanınıń kóbeyiwi hám ulıwma esapta grafika túriniń rawajlanıwı menen baylanıslı.
Ózbekstan zamanagóy grafikası bir ásirlik tariyxqa iye bolıp, XX ásir baslarınan baslap qáliplesip kelgen kórkem dástúrler milliy grafikanıń evolyuciyasın belgilep bergen. Bul procecste tiykarǵı faktorlar arasında ǴMDA mámleketleri xudojnikleriniń regionımızǵa kelip, baspa hám stanoklı grafika kórkem óneri túrlerine tiyisli shıǵarmalar jaratqanın atap ótiw kerek.
“Ózbekstan grafikası: keshe hám búgin” kórgizbesi tamashagóylerdi, súwretlew óneri ıqlasbentlerin stanoklı hám baspa grafika rawajlanıwınıń sońǵı 40 jıllıq dáwiri menen tanıstırar eken, ózinde bir neshe iri xudojniklerdiń dóretiwshiligin qamtıp aladı.
Kórgizbe tamashagóylerge Ózbekstan aymaǵında rawajlanǵan litografiya, linogravyura, monotiplik sıyaqlı quramalı baspa usıllarında jaratılǵan shıǵarmalar menen jaqınnan tanısıw imkaniyatın beredi. Milliy grafikanıń baspa texnikalarınıń rawajlanıwı, onıń kórkem dástúrlerin saqlaw hám úgit-násiyatlaw máseleleri bolsa mádeniy miyrasımızdıń áhmiyetli wazıypalarınan esaplanadı.
Kórgizbe usı jıldıń 19-yanvarına shekem dawam etedi.

Gulnoza Boboeva, ÓzA